Tukin zing khan Venghlui leh Tuikual South Area-a awm Treasury Bazar a kang a, kangmei chhuahchhan hi chiang taka sawi tur a la awm lo niin an sawi a, helai bazarah hian tute emaw riak thinin, Mei pawh an chhem thin a, chuta tanga chhuak palh pawh a nih theih thu sawi a ni.
Kangmei chhuahna hmun hi AMC Mayor Lalrinenga Sailo chuan tlawh nghalin, bazar atan hman leh tura siam that tum ani tawh loh tih a sawi. AMC Mayor bakah hian Tuikual South awmna ward XII bialtu Deputy Mayor R. Thanglura leh Venghlui awmna ward XVII bialtu David Zohmangaiha bakah corporator engemaw zatin he hmun hi an tlawh, he hunah hian thuthar thehdarhtute zawhna a chhan naah Lalrinenga Sailo chuan Treasury bazar mai bakah dan lova kawngsira inzawrhna te tihtawp a nih tur thu a sawi bawk.
Mayor chuan Treasury Bazar chu tiamchin awm lovin khar rih a nih tur thu a sawi a, he bazar-a thute tan hian a thlang lawka AMC Complex, Tuikual South-ah an tan hmun a awm a ti a, Tuikual South huam chhunga kawngsira Inrinni-a inzuar thin te pawh inzawrh phalsak a nih tawh loh tur thu a sawi. Kawngsira inzawrh hrim hrim chu khap a nih thu Mayor hian a sawi a, phalna nei te aia dan lova inzuar ten advantage an neih chu thil nihphung tur a ni lo a ti.
Chhinchhiah danin Venghlui area lamah dawr 53 a awm a, heng zinga 35 chu kang chhe zingah an tel a, Tuikual South lamah hian dawr 29 a kang chhe bawk a ni.
Helai Bazar kang chungchangah hian Venghlui Local Council leh Tuikual South Local Counsilte chuan thuchhuah intawm siamin, helaia eichawp zawngte chu an tawrhpui thu tarlangin, “Bazar hi ytha zawka chin fel thuai a nih theih nan kangmeiin a tihchhiat sorkar department te bungrua sernghawi leh siam thar bak chu, tumahin kut lo thlak rih lo turin kan ngen a ni,” tiin hmalak zel dan tur pawh an puanzar leh tur thu an tarlang bawk.Ex-Mizo National Army Assn. te pawhin “Ram leh Hnam tana kan thawhpui PAMRA leh ZORO te office luahlai a kangmei rapthlak tak an tuar hi kan tawrhpui tak zet a ni,” an ti.
