“…Wine leh Beer chu zu a ni lo tih atangin a sawi mawi thapui an thawh a, Zu zuar lo inti mahse Zu Note (Naute) chu an zuar dawn chiang a ni…” – Pu Lal Thanzara, President, MPCC.
Vawiin March 14, 2025 (Zirtawpni) hian kum 2025 a Village Council inthlan zawh fel taka Kolasib Constituency huam chhunga VC thlan tharte leh Candidate-te chawimawina hun VC Kolasib Shopping Centre Hall-ah hman a ni a. He hun hi Pu Lal Thanzara President, MPCC in a hman pui a, Congress party hminga Village Council Candidate-te leh thlan tlinte chawimawina thuziak leh pangpar ṭhi a hlan bawk.
He hun hmanpuitu Pu Lal Thanzara, President MPCC chuan, Politics-in a ken tel chu rinawmna a ni tih sawiin, Party rintlak leh rinawm nihna lanna chu mipuite hnena kan intiamna manifesto leh Policy tih hlawhtlin a ni. Congress party chuan kan intiamna kan ti hlawhtling a kan hlenchhuak thin. Remna leh muanna kan tiam a, Chief minister thuthhleng thlenga kianin Mizoramin Remna leh Muanna kan neih theih phah a. A hnuah Mizoram mipui leh chhungkaw mamawh Rangva sem kan tiam kan tihlawhtling a, Mizoram chhungkaw tin thleng phak NLUP pawh kan ti hlawhtling a. A chhawrtute chu tuna ZPM a mi te, MNF party te an ni. Hei hi Congress party in rinawmna nena hma a lak thin vang a ni. Party dang sorkar hian mipui a huam ve ngai lova, mipui sorkar tiamtute pawhin an kuthnathawktute tana an intiamna Sawhthing lei chungchangah pawh an party mi ni lo chu nasa takin an daidang a, MNF pawhin mipui huap hmasawnna an kalpui ngai lova an thei bawk hek lo a ni, a ti.
Pu Lal Thanzara chuan kan sorkar hrawn mek hian engmah ruahman fel a nei lo, research base veka hma la nghal tura intiamin Mizoram mipui sum min arkhawthimdai pui a, a buai nuaih a, a la buai dawn chauh a ni tih sawiin, NLUP khan Mizoram hmel a tha zawngin a her danglam a. Mizoram chhunga kuthnathawktute thlai thar phurhna kawng leh hmasawnna rotling zawng zawng hi a thawk chhuak a. Khaw tam taka chhungkaw dinhmun thaa lo ding ta, huan leh ram rotling tam zawk hi NLUP avang a ni. NLUP chuan chhungkaw tin a zawng chhuak a, an hnen a thleng phak a. Mizoram Political party-ah Congress chauh hi kan intiamna tihlawhtling thin awm chhun a ni, a ti.
ZPM sorkar hian Kuthnathawktute tana an intiamna hi Mizoram mipuiin kan thlir a, tihlawhtling tur pawhin kan beisei a, kuthnathawktu te’n an beisei hi hmu ngei se kan duhsak a ni.
Congress party-a awm ringawt pawh hi Pathian rawngbawlna a ni tih sawiin, Pu Lal Thanzara chuan a chhan lian tak chu Kristian sakhaw tana ding ngam awm chhun a nih avang a ni. MNF leh ZPM erawh Kristian dodaltu BJP nihliap hnuaia awm a, BJP an keh chhiat hun hun an chhiat hun a ni. Kum 2023 inthlanah MNF in an duh anga BJP pawisa an hman theih tak loh avangin Campaign-na sum an harsa a, an tla zui. BJP in MNF aia hmanraw hman tur atan ZPM an rawn thlang chhuak chat a, 2023 inthlanah khan BJP malsawmna dawngin an hausa ta hle a an tlin phah bawk. Mahse BJP lakah an thutiam an hlen chhuah tak loh avangin BJP malsawmna an duh angin an hmu thei lova, a tawpah Zu zawrhna kawngkhar an hawng a, kan tha bik dawn a, kan danglam bik dawn tituten Wine leh Beer chu zu a ni lo tih atangin a sawimawi thapui an thawh a, Zu zuar lo inti mahse Zu Note chu an zuar dawn chiang a ni, a ti bawk.
Thutiam hlenchhuak thin Congress Party-te Mizoram mipuiin nghakhlel takin min thlir a, chutiang tur chuan hmun tinah Congress party nasa takin a tho chhuak a. NLUP changtlung zawk hmangin Mizoram chhungkaw tin thleng phak hmasawnna tluantling kan thlen tir leh dawn. NLUP changtlung zawk chuan tute mah a daidang ve lovang, a ti bawk.
He hun hi Pu Lalthuamluaia, Vice President, Kolasib Block-I Vice President in a kaihruai a. Pu Lalhmingthanga Pachuau, President ADCC pawhin thu a sawi bawk. MPCC President hi Pu Hosana Khiangte, Secretary to President MPCC, Pu M.S Dawngliana, Secretary MPCC, Pu Samuel Lalvawng, Secretary MPCC, Pu Lalremruata, Executive Member, MPCC, Vanhnuaithanga, General Secretary ADCC, Tv. Jerry Vanlalhlimpuia Vanchhawng Secretary ADCC, Pu Lalthanglura, Secretary ADCC, Tv. C. Lalrochhara GS MPYCC leh Kolasib Block-I leh Block-II huam chhunga Congress Party worker thahnem tak an tel a ni.
