March ni 10 &11, 2025 Thawhtanni leh Thawhlehni khan Dr. Lalmalsawma Nghaka, Treasurer MPCC chuan Sailam, Chamring tlangdunga kuthnathawkte a tlawh a. Dr. Mala hnenah sawhthing chingtuten an mangan thu an thlen.
Dr Mala chuan, “A intiam angin sorkar a awm loh avang leh, a hun taka Sawhthing leh Hmuhphiah an lei loh avangin kuthnathawkten harsatna namen lo an tawk chho ta zel a. ZPM a sorkar tirh, Dec ni 11, 2023-a CM-in thlai thar lei nan Vaibelchhe 110 ‘Kan DAH’ a tih leh, kum 2024-25 Budget-a thlai thar leina tur Vaibelchhe 200 an dah, avaiin Vaibelchhe 310 chu eng atan nge hman an duh tak, kan DAH an tih kha an DAH ṬHELH ta mai zawk em ni,” tiin a sawi.
MPCC Treasurer chuan, “Chhimphei tlangdunga kuthnathawkte hi tunhma atanga thawk rim leh taima-a sawi anni a. Tun hnaiah Sorkarin a thlan bik, Ropuiliani Women Farmer Producer Company Limited kal tlanga Reliance Retail Limited ten Sawhthing an hralh chhawn tur, Chamring leh Sailam khua atanga quintal 100 lek an leinaah, nasa takin kuthnathawkte chu Horticulture Minister leh CM hialin, Mizoram mipuite hma-ah ‘Mi rinawm lo leh dik lo’ tak anga an puh ta mai hi a vanduai thlak hle a. A bik takin Horticulture Minister phei chuan tawngkam duh tui lo hlein, Mizoram Mipuiten Zonun Zemawi tia kan vawn thin hre ve ngai lo ang hrima a duh duh a sawi hi a pawi kan ti hle a, ngaihdam dil hial se kan duh a ni,” tiin a sawi bawk.
Dr. Mala chuan, “Kan chhui chiannaah November thla tawp lamah khan, Ropuiliani Women Farmer Producer Company Limited hotute hian Chhimphei tlang dunga Sawhthing hmunte a hmunah ngei tlawhin, sample-te pawh la-in, ṭha an tih thu an sawi a. He Sawthing quintal 100 lek leina-ah pawh hian a buknaah leh endiknaah he company hotute hi an tel ve ngei a. Mahse, a hnu lawkah kan Minister zahawm takin chu sawthing chu zaa sawmli lai hralh tlak loh leh bawlhhlawh kai anga a sawi ta mai kha a mak hle a. Reliance Retail Limited thusawi chu kan Mizo kuthnathawkte thu sawi aiin a ring zawk ta mai em ni? A hmunah finfiahin an endik em? tih hi kan zawhna a ni. Kuthnathawkte an puh hmingchhiatna hi Sawhthinga eizawng, thangkhat lian zet lo buaipui tawh ten, thil ni thei a nih loh zia an sawi a. Kuthnathawkte mawhpuh mai lovin, a lei chhawngtu leh endiktu Ropuiliani Women Farmer Producer Company Limited te pawh an mawhphurhna a awm em chhui chian ni se, Reliance Retail Limited lamin Sawthing hralh tlak loh an tih ho hi hralh tlak loh a ni ngei em? tihte finfiah hmasa turin kan duh a ni.”
“Chhimphei tlangdung mipuite hi mi taima leh mahni tawka intodelh anni a. Serthlum, Sawhthing leh Fu-ah te ngat phei chuan Mizorama nei tha in ti an ni a, hetia rampum huapa Fact Finding tak tak awm lova, vai company pakhatin an rawn sawi vang mai a, mi sual chhuaha kan sorkar hotuten an chhuah ta mai hi a vanduai thlak takzet a. Hetiang hian vawikhat mah ti tawh lo turin kan ngen a. An intiam anga Mizoram puma kan kuthnathawkten an thar chhuah Sawhthing, Hmunphiah, Aieng leh Hmarchate hi a bo a bang awm lovin, an intiamna rate ang thlapin, an kawtkaiah ngei leisak turin kan phut tlat a ni,” a ti bawk.
Dr Lalmalsawma Nghaka, Treasurer MPCC hi Pu Lalrinliana Agriculture Department Director(Rtd), MPCC Farmer’s Department Chairman leh hruaitu dang ten an tawiawm a ni.
