Mizoram Legislative Assembly session neih mekah nimin khan zu khapna dan siamthatna tur, “The Mizoram Liquor (Prohibition) Amendment Bill, 2025” chu eptu te tel lova pass a ni.
Bill puluttu, Excise and Narcotics Minister Pu Lalnghinglova Hmar chuan he bill hi zu phalrai na tur a ni lo tih sawiin, sum siamna tur lian tham pawh a awm lova, vote zawnna tur a ni lo bawk tih House a hrilh a, he bill hi kuthnathawktute lam tang bill a ni a, zu khap burna a ngheh lehzualna tur a ni tih a sawi a ni.
He bill chungchang hian sawi a hlawh hle a, member 23 in house chhungah an sawi a, Speaker Pu Lalbiakzama chuan he bill he house chhunga chai hlawh ber pawl a ni tih a sawi a ni.
Eptu hruaitu Pu Lalchhandama Ralte chuan, zu khap bur an duh laia zu zawrhna tur bilh luhna bill chu an pass pui thei lo tih a sawi a, house an chhuahsan a ni.
BJP MLA Dr. K Beichhua chuan dan thar zeh luhah Excise and Narcotics in special permission nei ho chunga zu a zuar tur chu an pawm thei lo a tih a sawi a ni.
House Leader Pu Lalduhoma chuan member ten house an chhuahsan chu pawi a tih thu sawiin, bill lungrual taka pass theih an duh a, eptu lamin an duhlo a nih pawhin ‘duhlo’ an ti mai turah ka ngai a ti a, he bil hi zu zawrh phalna ah ngaihsak luiin puh lui tlat mahse Zoram mipui ten an pawmpui theih a beisei a ni, a ti.
Excise Minister Pu Lalnghinglova Hmar chuan tuna MLP Act hman mek chuan Autonomous district 3- Mara , Lai leh Chakma Autonomous District Council te a huam lova, tuna an bill putluh hi chuan Mizoram pum a huam tawh dawn tih sawiin, Autonomous district 3-ah te pawh hian sap zu leh rakzu te chu khap vek a ni dawn tih a sawi a, hemi chungchangah member te atanga a duhlo an awm avangin Autonomous District Council a hman ve tumna erawh ennawn theih a ni ang a ti.
Excise and Narcotics Minister Pu Lalnghinglova Hmar chuan The Mizoram Liquor (Prohibition) Amendment Bill, 2025 chu kuthnathawktute’n an hlawkpui dawn avangin Agriculture leh Horticulture department te tana malsawmna an nih theihna tur bill-ah an ngai tih a sawi.
Excise Minister chuan dan hman mekah chuan tun dinhmunah Champhai leh Hnahlana grape atanga wine siam chauh phal a ni rih a, balhla, lakhuihthei leh dragon fruit bakah thei dang atanga wine siamchhuahte chu dan bawhchhiatna a ni vek tih sawiin, Mizorama kuthnathawktu thei dang chingtute pawh an hmangaih ve vek avangin an thei tharchhuah hmangin wine siam ve se an duhsak avangin he bill hi an pulut tih a sawi a, Excise and Narcotics Department atang ngei pawhin dan hman lai siamthat tul tihna awm bawk avangin dan thar an duang tih a sawi.
Hemi chungchangah hian Kohhran hruaitute an rawn hnuah Zu pui leh Zu tuitling an duh loh avangin tun thla March ni 1 khan an dan thar duan atangin an paih leh ta a, an bill putluh chu kuthnathawktute tharchhuah thei leh thlai hmanga wine siam phalna chauh a nih thu sawiin, MNF sorkar hunlaia wine, alcohol 10 percent siam an phalsak bak chu he danah hian telh an tum lo tih a sawi a, he dan thar an duanah hian ram pawn atanga beer lakluh phal a ni lova, local fruit beer siam chauh an phal dawn tih a sawi bawk a ni.
Eptu hruaitu Pu Lalchhandama Ralte chuan he bill hi tlanchhe pahin House-ah tum hnih putluh a nih thu a sawi a, a bul tan tirhah chuan zu chi hrang hrang zuar turin an ruahman a, he bill hi a putruk tak avangin kohhran hruaitute chuan Chief Minister leh Excise Minister te an kawm hnuah a bill chu hmanhmawh takin an siamtha leh hnuhnawh niin a sawi a, ZPM kaihhruai sorkar chuan kohhran leh NGO te thurawn an ngaipawimawh lo hle a hriat thu a sawi a. ADC huamchhunga awm ten Sixth Schedule zalenna an neih te an pawngsual sak chu pawi a tih thu a sawi a, hei bakah hian Excise Minister chu he bill hian khawtlangah nghawng a neih dan tur te an zirchiang em tih te, mihring hriselna a nghawng theih dan tur te an ngaihtuah tel em tih zawhna te a zawt a, he bill-ah hian zu zawrh leh thlah zalen duhna lian tak a awm ni-a a lan thu sawiin, ZPM kaihhruai sorkar chu kohhran te kawra hmangah puhin, zu zawrh chak, a taka zuar ngam si loah a puh bawk a ni.
