Aizawl, the 10th March, 2025 : Vawiin khan ZPM General Headquarters chuan party Office-ah chhung inkhawm an hmanga, thusawitu Pu C.Chalsawithanga, Consultant chuan, “Eptu party ten Airport chungchangah hian thu dik an hre lo hrim hrim nge an hre lo der? Dik zawk hre reng chunga thu dik tawk lo sawi reng a nih chuan a mak takzet ang,” a ti.
Pu C.Chalsawithanga chuan, ” Airport hi kan veiin kan ngaihtuah a, thlawhna chuan man Mizoten ka chawi tam bik em em mai hi a dik thei lo. India ramah kan thlawhna chuan man a to ber a, kan thenawm Manipur, keini aia New Delhi hlat zawk pawhin kan chawi zahve vel chauh ticket manah an chawi a ni!. PCN (Pavement Classification Number)an ti a, Airport an siam dawn khan kan Engineer-ten hei hi an lo tisual a, PCN hi 40 tal a nih loh chuan Boeing 737 leh Airbus 320 te hi rawn tum thei lo tur a ni. Lengpui Airport hi PCN 36-in an lo duang a, Aviation technical thil an hriat fuh tawk loh vang pawh a ni mai thei. PCN 36-ah chuan passenger 145 aia tam a phurh theih loh laiin passenger 180 phur thei a rawn tum a ngai si a, Passenger phur tlem thei deuh rawn tum mai se a tih ngawt theih loh. Aircraft Classification Number awmin chu chu PCN nen a inmil a ngai a, mi 180 phur thei thlawhna a lo tum a, mi 145 chauh phur thei kan nih si avangin mi 35 chuan man kan chawi kep a ngai ta thin a ni. PCN hi tihdanglam a nih loh chuan thlawhna chuan man hi a to reng dawn a. Hei hi hriain kan hotuten PCN hi a tlem berah 40 tal in chho thei turin ruahmanna an siam a, sum leh pai a ngaih hnem avangin thawhpui tur an zawng ta a ni,” a ti.
ZPM Consultant chuan, ” India ramah hian AAI hnuaiah Airport 137 vel awmin Military Air Field 53 a awm bawk a, AAI ta bil (Civil-in kan tawmpui loh) hi 19 awm mek a, Civil-ten kan tawmpui loh sipai ta bik hi 14 a awm bawk. Sipai nena kan intawm hi 51 awmin AAI leh Civil intawm hi 28 a awm a, IAF leh Civil intawm hi 23 a awm ve bawk. IAF leh Civil airport intawm hi chi hnih a awm leh a, Civil Enclave leh Joint User Airport an ni a, Civil rama sipai zawk lo telvena hi kan dinhmun chu a ni dawn ta a ni. India ramah 10 chauh a awm a, hetiang airport hi Sipai tan ni lovin Civil airport a ni zui vek thin. Eptuten heng sipai ta bil airport hi Lengpui airport nen tehkhin luia mipui thluak suk an tum avangin kan buai ta nuaih nuaih a, mahse thudik chu kan sawi ang hi a ni. Tezpur leh Jorhat airport chu sawi loh, Guwahati leh Kolkata airport thleng pawhin Lengpui airport nen hian tehkhin chi a ni lova, mipui ta bil leh sipai ta emaw, AAI leh intawm airport dang nen tehkhin chi kan ni lo. Heng zawng zawng hi Eptu party-te hian an hre hrang lo nge an hre lo der nge? hre reng chunga dawt phuahchawp chungin hemi chungchang huai tak taka an sawi reng hi a mak takzet a ni,” a ti.
Corruption chungchang sawiin Pu C.Chalsawithanga chuan, ” LADC ECM Pu Zirsanga chungchangah pawh hian hriat fuh tawk loh a awm niin a lang a, convict ni mahse a appeal avangin stay a ni a, conviction reng rengah stay a nih chuan convict a ni thei tawh lo. Nakkin zela an kalpui dan tur chu thuhran nise tun dinhmunah erawh dan mit atang chuaun convict a ni lo. Pu Zoramthanga case kha kan ngaihtuah let chuan thiam chantir ni lovin thiam loh chantir loh a ni. Bible-ah pawh kan hmu a, uirenu kha Isua khan thiam a chantir hauh lova, ” Kei pawhin thiam loh ka chantir lo a che” a ti a nih kha. Thiam chantir leh thiam loh chantir lo hi thil dang daih a ni,” a ti bawk.
Vawiin party chhung inkhawm hi Pu C.Lalthanfela, PAC Member chuan a kaihruai a, Pu Rosiamhnuna, Upa Committee President chuan hunserh hmangin party mite an kal tha hle a ni.
