Vawiin February 6, 2025 (Ningani) hian MPCC Senior Vice President Pu Lalnunmawia Chuaungo chuan Bualpui, Bukpui leh N. Chaltlang te tlawhin Congress Party zawmthar ZPM, MNF leh Neutral mi thahnem tak a lawm lut.
Pu Lalnunmawia Chuaungo chuan, tunlai hian sorkar lai leh party dang bakah Neutral mi tam takin Congress Party an rawn zawm nasat thu sawiin, Congress party a nghet taka awmte nen ram rawngbawl hna thawk turin kan inhrual mum mek a ni, a ti. VC leh LC inthlan zawha Congress Party zawm tum pawh an thahnem hle a ti.
Congress Party boruak tha tak mai chuan kum 2028 MLA inthlan a chakawm tawh zia sawiin, Pu Nunmawia chuan, Mipui nawlpui in hmasawnna kan neih loh chuan kan ram kan hnam hian hma kan sawn dawn lo. Mipui nawlpui in hma kan sawn theihna turin Mizoram mipui huapzo NLUP changtlung zawk kan kal pui dawn a. Hlim takin hmalam hun mipuiin an hmang leh ang. Education hi duh dah taka enkawl chi a ni loh avangin education reform kan kal pui dawn a ni, a ti.
Coliation sorkar hian rei a daih ngai lo, tih sawiin ZPM hi chutiang sorkar chu an nih avangin mipui beiseina awm chhun Congress Party in ram rorelna chelh turin kan in ruahman mek a ni. Mi sawi chhiat thiam em em sorkar, hna tak tak thawk thiam si lo sorkarin ram hmasawnna a hnufual zawngin min kalpui a. An hna thawh ber chu midang sawichhiat a ni. Kum khat an han sawrkar a, an sawi ang engmah a ni lo tih a lang leh si a. Aizawl khawpuiah ngei pawh ZPM tuipuia an Campaigner te ngei pawhin ZPM sorkarah beisei an nei tawh lo. VC leh LC-ah hneh taka ruling lai an chak thin angah ZPM sorkar chuan beisei an phak dawn lo. An sawisel MNF ang chiahin tawngkam chauha ram hmangaih an ni a. Heng avang hian mi tam zawkin Congress Party lam bawk an hawi leh mek ani. Khawpui boruak a danglam tan tawh a. Mithiam leh mi tha te hian Congress an ti tan tawh a. Mi tute pawhin an belh tlak ni turin Congress party hian hma a la mek ani, a ti.
Pu Lalnunmawia chuan, hnam tenau leh kristian sakhua vuantu te tana him lo ZPM chakna thahrui BJP central ah an awp-rawp mek tih sawiin, Central-ah Congress a dingchhuak thuai dawn. Congress Party in sorkarna kan chelh hunah chuan ram changkanna leh hmasawnna ziktluak kan kalpui lehnghal dawn ani, a ti bawk.
MPCC Senior Vice President hi Pu Lalhruaitluanga Bawihtlung, General Secretary leh Pu Vanlalzuata Sailo EM ten an tawiawm a ni.
