Vawiin February 6, 2025 Ningani hian Aizawl South II Constituency huamchhunga Congress aiawh Local Council candidate-te Rev. Lalrinmawia, Ex-Moderator hovin Pathian hnena inhlanna hun an hmang. Ram puma party hrang hrang Local Council leh Village Council Candidate te pualin tawngtai rualna an nei nghal a ni.
Hun hmanpuitu Dr. Lalmalsawma Nghaka chuan, “Kohhran hrang hrangte Isua-a kan inpumkhat ang hian Congress Party-a mi hrang hrangte hi mi retheite khai chuak turin kan inpumkhat tlat a ni,” tih thu a sawi.
Dr. Mala chuan, “Thingtlang lama kan unaute khawsak a harsa em em a, khawpui lam a mite tan pawh eizawnna a hautak chho ta zel. Vawiinah hian Congress party angin Local Council leh Village Council-ah kan ding tak na a, mi zawng zawng, a bik takin mi harsa zawk leh insawi thei lo te chanvo humhim sak hi a pawimawh ber a ni. Khawtin leh hmun tina kan hruaituten, ‘Kei ka din loh chuan tunge ding chuang ang’ tia mipuite harsatna hria-a an rawn dingchhuak thin hi Congress kan danglamna a ni a. Headquarters lama kan hotute pawh tho thil ang thap an nih avangin Congress Party hian hma kan sawn hle a. Pathiana finna kan chan zel a, mi harsa zawkte dinchhuahna tur policy kan neih zel theih nan intawngtaipui tawn a tul hle.
“Ran hruaitute chu mi retheite tana ding tur kan nih laiin vawiina kan ram hruaituten motor changkang leh man to ber ber nena an tleng zel zel ta mai hmuh hian ka hmin thei lo a, kan ram mipuite an rum laia nawmchen hi a him lo. Pathian khawngaihna a zara hlawhtlinna kan chang a nih chuan kan ram dinhmun a that a, mi nawlpuiin leirem an rap chho a nih hma chu nuam i chen lo vang u.
“Local Council leh Village Council member tha ni turin hlemthletna laka fihlim, dik leh rinawm a pawimawh hmasa ber a, kan vai hian dikna leh rinawmna hma chhuan ngam ila, Pathian tihna tak tak leh thawhrimna nena mipui rawngbawl mi ni lo tan he hna hi a rem lo a. Mi dang zawng zawng aia thawkrim, mahni thawh rah ngei ei mi an ni tur a ni. Tin, Local Council leh Village Council memberte chuan faina leh zirna an ngai pawimawh ngei ngei tur a ni.” tih thu a sawi.
He intawhkhawm hi Block President Pu H. Lalduhawma’n a kaihruai a, veng hrang hranga Local Council candidate te an kal tha hle.