Aizawl, 18th December, 2024: Aizawl Municipal Corporation (AMC) chuan Pi Saiziki, Republic Vengthlang ram, ITI Veng area chhunga leivung paihin Chite Lui a thleng tih a hriat ve leh rang takin hma a la nghal a. Vawiin khan cancellation (tihtawpna) order chhuah nghal in, Leivung leh Construction & Demolition Waste paihna atana hman tawh loh tur a nih thu a chhuah a ni.
Vawiin chhun dar 12 khan, hemi chungchang ngaihtuah turin Aizawl Mayor Pu Lalrinenga Sailo hovin Emergency Meeting neih a ni a. Meeting-ah hian Pu Lalringliana, Executive Corporator; Pu Joseph H. Lalramsanga, Municipal Commissioner; Pu Rochamliana, General Secretary, Save Chite Lui; Pu Srinivas Sadi, IAS, SDO(S), Aizawl DC Office leh officer dang te an tel a.
Meeting ah hian Pi Saiziki, Republic Vengthlang rama Leivung paih avanga Chite Lui a leivung lut hi paihfai turin a neitu hriattirna pek ni se tih a ni a. Meeting thuchhuak ang hian AMC chuan hma a la chhunzawm dawn a ni.
Aizawl khawpui hi a than chak em avangin leivung kan tihchhuah pawh a tam hle a, a paihna hmun a awm loh chuan kawngsir leh hmun remchang laiah a ruka paih a ni thin a, hei hian harsatna tam tak a thlen thin a ni. Chuvangin, AMC chuan leivung paihna hmun tur a zawng reng a, rawtna neite chuan AMC ah report vat turin mipuite kan ngen a. Tin, Local Council zawng zawng hnenah an area chhunga leivung paihna hmun lo zawng tura hriattirna pek a ni bawk. Hun rei tak atang khan AMC chuan Search Team dinin, leivung paihna hmun tur zawngin hmun hrang hrangah an lo thawkchhuak tawh thin a ni. Tin, Aizawl Smart City Ltd. chuan leivung paihna hmun tur Khatla Veng-ah a siam mek bawk a ni.
AMC in phalna (license) a pek hmunah chauh leivung hi paih theih a ni a. Tun dinhmunah hian leivung paihna hmun 7 (pasarih) a awm a, chungte chu:
1. Durtlang Leitan (Owner – Pu Lalhmachhuana, Ph – 9856090601)
2. Durtlang Leitan (Owner – Pi Juliet Lalengkimi, Ph – 9862439478)
3. Saikhamakawn (Owner – Pi Rozami, Ph – 9862880024)
4. Phunchawng (Owner – Pi Lalmalsawmi, Ph – 9436141949)
5. Lawipu (Owner – Pu Vanlalzawma, Ph – 9612164730)
6. Hlimen (Owner – Pi Laltlanpuii, Ph: 8414962173)
7. Rangvamual (Owner – Pi Julie Lallianzuali, Ph: 7347213192)
Heng leivung paihna hmun te hi AMC chuan uluk zawkin a vil zui dawn a, dan an bawhchhia a nih chuan na takin hma a la zel dawn a ni.
Tin, leivung leh bawlhhlawh paih ruk thinna hmunah CCTV dah turin AMC leh Aizawl Smart City Ltd. ten ruahmanna a siam mek a, a dahna hmun tur pawh enfiah a ni tawh a. Hemi bakah hian AMC chuan hmun pawimawh bikah a rang lamin CCTV a dah dawn bawk a ni.
AMC in dan bawhchhia a man te hi an phutawk hremna pek a ni thin a. Chuvangin, mi tupawhin dan bawhchhia kan hmu a nih chuan rang takin AMC ah hriattir (report) thin turin kan inngen thar leh a. Thlalak emaw Video emaw nen Ph No. 8575561415 ah Whatsapp kaltlangin report tur a ni.
