Vawiin December ni 16, 2024 (Thawhtanni) chawhma dar 11:30am hian MNF chuan Mizo Hnam Runah kumin 2024 atan ‘Mizo Hnam Run kharna’ hun hmangin, MNF-in Ni pawimawh tak tak 6 a neihte zinga pakhat ‘Exodus Day’ a hmang. Matarte hriat reng nan minute khat chhung ngawi renga din anih hnuah a hu hova tawngtai rualna neih a ni.
He hunah hian MNF President Pu Zoramthanga chuan sorkar tharah sum leng vak a van thu te, Mizoram sorkarin ni 100 inhlawhna a bat sak reng chu pe thuai tura a phut thu leh, MNF hun lai chuan Central atangin sum sanction lo mahse; advance-a an pek zel thu te, mipuiin christmas leh kum thar hlim taka an hman theih nan sorkar hnathawk hlawh leh thil dang dang pe thuai tura sorkar a phut thu a sawi.
Pu Zoramthanga chuan Exodus Day lo chhuah dan sawiin, December ni 16, 1971-ah East Pakistan khawpui Dhaka, tuna Bangladesh ni ta hi India-in a lak tuma MNF headquarters Rangamati, Tuipui zau tak hual vel kara awm, Meilawng 7 hmanga mak tak maia Pathianin a hruai chhuahna Ni anih thu a sawi.
December ni 16 hi India sipaite tan hnehna ni ropui, an hmelma Pakistan tlawmna ni ‘Vijay Diwas’ anih rualin MNF sipaite tan pawh India lak atanga chhanchhuahna ni ropui a ni a. “Harsatna su turin Pathianin MNF hi a tir atangin a din a, a sut kiantir thin a, kawng lakah a kalsan lovang,” MNF President chuan a ti.
Pu Zoramthanga chuan rambuai kha Pathian ruat anih thu sawiin, “Pu Laldenga khan buai lova Shillong-ah dawhkan kila sawiho pui a tum laiin, Assam Chief Minister khan inremna bawhchhiain, sipai a rawn tir lui a, kan ram a buai ta a ni,” a ti bawk.
“Kum thum chhung India nena indo hnuah tlanchhiat a ngaih thu leh harsatna tam tak karah India biak dan zawn anih thu a sawi a. “Mihring tumna leh remruatna zawng zawngte kha lo hlawhtling se, vawiina kan inremna ang hi a chhuak lo ang. Kan hlawhchhamnate kha Pathianin Zoram tundin a tumna zawk a ni,” tiin, Pakistan President Ayub Khan remtihnain Pakistan-a an chhuk thu leh, thinglubula dan chepna atanga an chhuah zalenna (Exodus Day) chu Pu Laldenga leh a hote remruatna ni lovin, Pathian remruat a ni, Pu Zoramthanga chuan a ti bawk.
Pu Lalruatkima MNF Treasurer chuan VC/LC inthlan kan hmachhawn turah MNF party inbuatsaihna hrang hrangte puangin, MNF hmingin Zoram mipui zawng zawng christmas leh kum thar chibai a buk nghal.
Mizo Hnam Run hi kum thar January ni 13, 2025 (Thawhtanni) chawhma dar 11:30am-ah hawn leh a ni ang. Vawiin inkhawm hi Pu Vanlalzawma Vice President MNF chuan kaihruaiin Pu C.Zahmuaka Adviser, MNF Gen.Hqrs. chuan hunserh a hmang.
