Dated Aizawl 13th December,2024: Vawiin khan ZPM Upa Committee General Headquarters chuan I&PR Auditorium, Aizawl ah Advance Christmas an hmanga, he hun hmanpuitu Pu Lalliansawta, ZPM Party President chuan, “Zoram siamthat hna hi Pathianin kan ko ah a nghat a ni,” a ti.
ZPM Party President Pu Lalliansawta chuan, “ZPM in Upa Commiittee kan nei hi thil fuh tak leh hlu tak a ni a, kan Party min uaplumtu leh min ti zahawmtu a ni. Pathianin mihring min siam danah taksa bung hrang hrang ten hna thawh hrang hrang an nei ang bawkin ZPM Party chhungah pawh hlawm hrang hrangin kan intelkhawm a- Upa Committee, Thalai Hqrs, Zonu Hqrs VUC etc. ten kan tih tur theuh kan tih avanga vawiin thlenga ZPM Party hi la kal zel thei a ni a. Ram siamthat duhtu intel khawm kan nih angin Zoram siamthat hna hi Pathianin kan ko ah a dah a ni,” a ti. Kan ram a damlo tih hi keini chauh ni lovin mipuiten an hre chiang hle a, hruaitu hmasate kutah kan ram damna a awm lo tih pawh mipuiten an hriat avangin ZPM Party kutah ram rawngbawl hna an hlan ta a ni. Chuvangin keini ho hian dawngdah takin he ram rawngbawlhna kan thawh a rem ve lo a, kan theihna zawng zawng nen Pathian duhdana he ram siamthat hna thawh hi kan tih tur a ni,” a ti.
ZPM President chuan, “Ram rawngbawl hna thawk tur hian Party hi a pawi mawh hle a, kan inpui ber a ni. Mi tupawhin ram veiin, a siamthathna tak tak thawh duh mahse eng party mi leh sa emaw sorkarna chelh theih tura mipuiin an rin ngam party a, a awm loh chuan ram siamthat hna tak tak thawh hi a har em em a, chuvanga ZPM Party pawh pawl anga intelkhawm kan ni. Tui mal far tetein tuifinriat a siam angin keini ram siamthat duhtute pawh kan intel khawm avangin vawiin ah hian Pathian leh mipui zarah Sorkarna kan lo chelh thei ta a ni. Party hi sorkarna kan siam theihna hmun a nih avangin kan ngaipawimawh tur a ni a, kan inpui ber a ni tih hi kan hriat reng a tul a ni,” a ti.
Ram siamtha tur hian Mimal tin kan pawimawh hle a, a bikin paty mi leh sa te thinlungah ram siamthat duhna tak tak a awm phawt chuan, chutiang mimal tinte intel khawmna party chuan ram siamthat hna an thawk ngei ang tih a rinawm a, mimal hlawkna aia ram veina thinlung kan put phawt chuan chu thinlung chu Pathianin mal a sawm ngei ngei ang tih hi ka ring tlat a ni,” a ti.
He hun hi Pu Rosiamhnuna, President Upa Committee in a kaihruaia, Pu C.Lalengliana Sr. Vice President in hunserh a hman bakah Secretary leh Finace report ngaihthlak a ni a, thil pek inhlanna hun hman a ni bawk.
