Vawiin khan ZPM General Headquarters Office ah PAC Extended Meeting neih a ni a. He hunah hian ZPM General Headquarters Office Bearers, Political Affairs Committee te leh General Secretary te an tel a, Sinlung Hills Council inthlanna neih zawh tak thlirletna hun hman a ni.
PAC Extended Meeting chuan, Sinlung Hills Council General Election neih takah theihtawp chhuaha ZPM General Headquarters inbuatsaihna te, ZPM Party leh HPC Party thawhhona te hi lawmawm a ti a. Campaign Committee ten ruahmanna fel tak siama Candidate tur mi tha tak tak chhawpchhuah a ni te, Ministers, MP leh MLA te bakah Block leh Unit-te thawhrimna te, Council Area chhunga Opposition MLA bial pahnih awm chunga Seat pali lai Pathian leh mipuite zarah lak a ni hi thil lawmawm tak niin a hria a, inthlanna thianghlim tak neih a nih theih nana thawktu te zawng zawng chungah meeting chuan lawmthu a sawi a, ZPM Party leh HPC Party te tang dunin sum leh therhlo hmanga vote a zawng ve lo hi lawmawm a tih bakah tun tum inthlan hi Sinlung Hills Council Area-ah Kalphung Thar Mipui Sorkar din chhoh zelna tura hmasawnna ropui takah a ngai a ni.
