Vawiin November ni 7, 2024 (Ningani) chawhnu dar 12:30 khan, Mizo Zirlai Pawl General Headquarters Executive Committee Meeting vawi 637-na chu MZP Conference Hall-ah neih a ni a. MZP Meeting-ah hian, Tribal scholarship chungchang bakah pawl chhung thil pawimawh hrang hrang rel a ni a. Meeting hi Pu H. Lalthianghlima, MZP President-in a kaihruai a ni.
Meeting chuan, Tribal scholarship 2nd Installment tun thleng a la sem loh chungchang a ngaihtuah a. Mizoram sawrkar-in Scholarship tur October ni 16 a a dawn tawh, tun thlenga sem la ni lo hi pawi a ti hle a. Zirlaite mamawhna hriaiin, ni 18 November 2024 (Thawhtanni) ral hma ngei a sem a nih loh chuan na zawk a hmalak a rel a, thuneitu teβn zirlaite harsatna hriatthiampui a, a rang thei ang ber a sem vat turin MZP chuan thuneitute a ngen nawn a ni.
Meeting chuan, MZP Assembly vawi 68-na ni 24 – 26 September, 2024 chhunga Champhai Tlangsam a rorel bawhzui dan tur a ngaihtuah a, a hlawhtlin theih nana zirchiang tur leh a tul anga bawhzui turin, mawhphurhna hrang hrang a siam a. Heng a hnuaia mite hi MZP rorelna sangin a thu relte chu a ni:-
1. Mizoram zirnain hma a sawn theih na tur atan, Directorate of School Education hi Elementary leh Secondary-ah then anih theih nan MZP in hma la rawh se.
2. Zofa hnam hrang hrang Zirlai pawlte nen kan thawhhona a that zawk theih nan, “Students’ Leaders Meet” neih ni rawh se.
3. Zofa hmun hrang hranga awm te’n, inpumkhatna nghet zawk kan neih theih nan MZP-in hma la chhunzawm zel rawh se.
4. Mizoram chhunga inkal pawhna kawngpui sialtu, NHIDCL ten tha zawka hna an thawh theih nan MZP-in hma la rawh se.
5. Mizoram Schedule Tribe List ennawn a nih theih nan MZP-in hma la rawh se.
6. Sawrkar hnathawk mahni nihna in a ken tel aia tam, hamthatna la leh hmang te sawrkarin a tih tawp theih nan MZP in hma la rawh se.
Zo hnam inkhawmpui lian Zofest 2024, ni 3 – 6 December chhunga West Phaileng a neih turah, thupui atan βHRUI KHAT VUANINβ tih hman a ni dawn a. Zofa hnam chi peng hrang hrang ziarang leh nunphungte lantirna hun leh thupui hmanga Zofate inpumkhatna tur sawiho a ni dawn a. Mizoram bakah, Manipur, Assam, Tripura, Bangladesh leh Buarma atangin palai an tel dawn a ni. MZP chuan Zofa hmun hrang hrang a awmte he hun hmang tur hian a sawm bawk a ni.
