Vawiin ni 06.11.2024 khan MNF Party chuan an office Mizo Hnam Runah Sinlung Hills Council (SHC) General Election vawi 2na inthlan result-ah MNF-in hnehna a chan avangin Pathian hnena lawmthu sawina hun an hmang a. MNF President Pu Zoramthanga chuan bukin kan awm a, lawmthu sawi theia kan awm hi a lawmawm hle, tiin Pathian remruat vek a nih thu a sawi.
“HPC (R) nena kan thawhhonaah lawmthu sawi theia kan awm hi a lawmawm hle. Inthlan laia rim taka thawktute chungah lawmthu kan sawi”, a ti.
Pu Zoramthanga chuan: “MNF an tla, an tih hian a tlak chhan kan sawi thin. Chu mi, kha mi vang chu a ni, NDA-a kan tel vang a ni tihte an sawi thin. Amaherawhchu, MNF hi Pathianin min puihna avanga ding chhuak chho a ni a, kum 63-naah pawh party lian tak niin kan la nung a ni. Vawi hnih khat inthlan hi Pathian ngaih pawimawh ber a ni lo. A changin min dah sang a, a changin min dah hniam thin a ni zawk.
“Party dangte chu a ral zel. Tuna ZPM sorkar hmang hian Pathianin engtinnge MNF hi min humhalh a tum? Kum 60 chuang min hruaitu hian kawng lakah min kalsan lo ang. A remruatna angin kan kal a, a thiltum tihlawhtling turin min hum zel ang. Kan thuthlung innghahna – ‘Pathian leh kan ram tan’ tih hi i zir zel ang u,” a ti.
SHC Bial 12-a inthlan report (MNF 5 + HPC’R 2) tawi ngaihthlak a ni bawk a – Pu Lalchhandama Ralte, MNF Vice President & MLA chuan a bial Tuivawl (MLA constituency) chhunga SHC Bial 6 awmnaah MNF-in Bial 5 a lak vek thu a sawi a. Bial pakhat – New Vervek erawh thil fel fai lo deuh a awm avangin State Election Commission kutah a la awm tih a sawi.
Chalfilh bial (SHC bial 4 awmna) thutchilhtu Pu Lalruatkima, MNF Treasurer & Ex-Minister pawhin report a pe a – Khaw 9 awmnaah MNF hotuten house to house an tuam chhuah vek thu leh a siruk laa an thawh thu a sawi a. “SHC bial 2 lain bial 2 hloh mah ila, Chalfilh bial pumah hian MNF kan hlawm tha em em a ni,” a ti.
Pu Lalrinsanga Ralte, GS MNF GHQ & MLA pawhin report tawi pein, Serlui bial (SHC bial 2) ah bial 1 lain bial 1 hloh a nih thu a sawi a. “Serafim anga enchhin cho (ZPM) sorkar chu kum khat chhungin hmar bialin an hne tawh hle,” a ti bawk.
Lawmthu sawina inkhawm hi Pu Vanlalzawma, MNF Vice President-in a kaihruai a, Dr. ZR Thiamsanga, Ex-MLA-in hunserh a hmang a ni.
