Vawiin ni 4, November, 2024 Thawhtanni hian MNF party chuan an office Mizo Hnam Runah chhung inkhawm an nei a, Ex-Dy. Chief Minister leh NCC ni bawk Pu Tawnluia chuan, Aizawl khawpui laili atang a Assam Rifle sawnchhuahna chungchanga MNF party hmalakna te a sawi.
Pu Tawna chuan, AR sawnchhuah hi Pu Laldenga, a hun leh tha zawng zawng kan ram tana hmang zotu sulhnu pakhat zinga pawimawh em em a ni. Kum 1952 khan S.Bartakati Aizawl DC, Luhshai Hills in Assam Rifle Standing Order No.II of 1952 a siam a, chu chu Assam Gazzette ah ni 8.8.1952 ah chhuah a ni. Chutah chuan Khatla AR te awmna hi an thingtuah lakna atan chauha pek an ni a, land ownership pek tel an nilo a, an tidanglam thianglo a, an hmanloh chuan sorkarah an pe let leh tur a ni, a ti.
Pu Tawnluia chuan, kum 1986 a remna thuthlung ziah a nih khan Pu Denga ngaih pawimawh hmasak ber zing ami chu AR sawnchhuah a ni. Zokhawsang a AR ram tura kan pek pawh Pu Denga CM lai, Revenue Minister ka nihlai a ni a, a tirah kan leng lo e, tiin an rawn report-a, survey neih nawn leh niin, mimal ram te dilin cheng vaibelchhe 92 lai compensate ah sen phah a ni a, tichuan a ram zau zawng chu 1296 acre niin ni 31 May, 1988-ah Zokhawsang a an awmna tur hi tihfel sak an ni a, AR sawnchhuahna tura hmalatu chu Pu Laldenga a ni, a ti bawk.
Pu Tawna chuan, AR Biak In hmun chungchang sawiin, tuna Chief Minister in MOU draft lo awm tawhah AR neih hlen tur anga a sawi kha thudiklo hulhual a ni. AR lamin draft rawn siam mahse, kan pawmpuilo. Kan sorkarah khan Quarter Guard leh Loch House te pawh hi Mizoram sorkarah an hlan ngei ngei tur a ni tih kha kan thu hnuhnung a ni, a ti bawk. Tin, Biak In hi Zokhawsanga an insawn hunah Church Building leh a compound te hi Mizoram Synod hnenah hlan a ni ang, tih a nih angin kum 1987-ah kan pe a ni, a ti a, Pu Denga hunah khan kan party office turin tuna Aizawl Dak Inpui te leh AR Biak In hi min kawhhmuh a, Pu Denga erawh chuan kohhran Biak In hi kan khawih thianglo a ni, a ti. AR Biak In hi kan chhuhsak lo a, kan lo humhalh sak zawk a ni, tih hi zoram mipui hriatah ka sawi duh a ni, a ti bawk.
Pu Tawna chuan Zokhawsang a AR hmun chungchang sawiin, kum 1988 a President Rule-ah kan luh leh tak avangin sawlai ram saw a thing ta thuap mai a. Kum 1998 kan sorkar leh khan kan CM hnenah, ‘Camp sakna tur min dil chhuahpui rawh’ tiin an ngen leh a, tichuan tuna an camp sakna tur saw kan President hian vbc 145 chuang a nawr chhuahsak a ni, a ti a. Pu Tawna chuan, kum 2006 khan Land Lease in Mizoram sorkarin AR hnenah kum 99 chhung an awmna turin mumal taka tihfel a ni a, Tui, Eng leh Kawngpui an insawnna tura an mamawh ang chu kan pe vek a ni, a ti.
Pu Tawnluia chuan, kum 2002 ah khan AR chhuahsan tur ram awl hi vangtlang(public purpose) ah hman ni rawh se, tih hi dan kan siam a, Legislation-ah kan passed bawk a ni, a ti. AR lam pawhin kan insawn dawn chuan tia tihfel ni rawh se, an tih zawng zawng pawh tihfel vek a ni, a ti bawk.
Ex-Dy.CM chuan, MNF chuan Pu Denga hun atang tawhin ‘AR hian an ram luahte hi avaiin an chhuahsan tur a ni, tih hi kan dinna nghet tak a ni, AR sawnchhuahna tur chungchanga lehkha pawimawh leh hmalakna awm zawng zawng hi kan tih vek a ni, kan hmalaknate kha chhui theihin a awm vek a ni, a ti bawk.
AR sawnchhuah chungchangah hian MNF party hian Gen.Assembly, kum 1988-ah khan alo pass hial tawh a, an hmun hlui pawh Vantlang/Mipui tan hman ni rawh se, tih thlengin kan lo pass tawh a ni, a ti bawk.
Pu Tawna chuan, AR sawnchhuah hi hnam issue a nih avangin chhuak ngei se kan duh a, tuna kan sawrkar nena agreement an siam erawh hnam tana himlo tam tak awmthei niin a lang thung. Hnam himna tura puih an ngaihnaah pui kan inhuam reng a, a hmun erawh joint verification an neih hma chuan khawihchet nilo sela a tha hle in ka hria a ti bawk.
Pu Tawna chuan, kum khat pawh tlin hmaa nawrh khum ngai sorkar hi ka la hre ngailo a, wheelbarrow sorkar an sawi ang maiin an sulhnu a tawp a, chhiah an tipung a, Oil man an tisang a, thil man lo sang chuan sumdawngten an hlawkna an chan phah a, mahni inhaivur nana mipui min hrek hi inenlet a, mipui tana thawk zawk turin ka chah duh a ni, a ti bawk.
