Dated Aizawl, 2nd November, 2024 : Vawiin khan ZPM General Headquarters chuan Party Office ah chhung inkhawm an hmang a, he huna thusawitu Pu F. Rodingliana Minister, P&E etc. chuan, Zoram mipuiten ZPM Sorkar ah rinna an nghah reng thu leh Kawlphetha a Mizoram Sorkar hmalaknate a sawi.
Pu Marova chuan, “Vawiin thlenga ZPM Ministry min beitute hi ZPM Party a dintirha min beitute tho kha an la ni a, nimahsela min beihrawn chung pawhin Pathian leh mipuite zarah hnehna kan la chang zel hi ZPM Party Pathinin min hruai zia tilangtu leh Zoram mipuiten ZPM Ministry ah rinna an nghah thukzia tilangtu a ni. Heng min beihnate hi kan Party tan malsawmna a ni a, kan ram rorelnaa Pathianram tundin kan tumzia mipuiten min hriatpui chuan a tawk hle a, eptu party ten dawt leh thutling lo hmanga min beihna ah hian buai tur kan ni lo, Pathian leh Mipuite kan lama an tan chuan a tawk a ni,” a ti.
Power Minister chuan,”Kawlphetha a intodelh turin nasa takin hma kan la a, department lama kan thawhpuite pawhin ngaihtuahna an seng nasa hle a, rim taka kan policy tihlawhtling tura tan an lakna ah lawmthu ka sawi a ni. Tuirini Project bikah, sorkar hmasaten he project an lo hnawl tawh chu a DPR te kan keu thar leh a, central lama kan tlanthlak pui hnuin he project hlamchhiah mai tur pawh tihnunin a lo awm leh ta a ni. Tuivai Project kan han buaipui leh a, kum 18 chhung sorkar hmasa lamin a bu an lo keu tawh loh leh DPR hlui tawh tak chu kan han thar thawh leh a, sorkar hmasate ruahmanna anga kalpui dawn chuan he tuikhuah hian Manipur State ram engemawzat a chim dawna, hei hi keini chuan harsatna awm theite kan ven avangin ruahmanna thar kan siam a, a hmunah kalin a tuikhuah chim chin tur kan tihniam ta a, 32 km chin khuapin Manipur state nen intibuai lovin he project atang hian 160 MW atanga 180 MW thar chhuah theih kan in beisei a, Mizoramin tuna kan mamawh san lai ber hian 163 MW a ni. Central Sorkar chuan he project atan hian Vaibelchhe hnih leh nuai sawmriat min pe ta a, thla 18 chhunga zo turin inremna kan ziak ta ani. A hlawhtlinna kan hmuh hunah chuan mizoram power mamawh chu kan thar chhuak thei tawh dawn a, chutiang zelin Tlawng leh Tuichang khuap tur pawhin hma kan la mek a, Tuichang DPR pawh kan peih thawkhat tawh, 52 MW chhuak thei turin ruahmanna kan siam bawk a ni,” a ti.
Pu F.Rodingliana, P&E Minister chuan,”Tuirial tuikhuah hi Sorkar hmasa hun laiin agreement a fuh lo hle a, sorkar sum tam tak a thlawnin a luangral nasa hle a, sorkar lu tihaitu a ni a, a power siam chhuah man to takin kan lei angaia, kan lei loh pawhin agreement anga pawisa kan chawi tho angai si a, Tuirial tuikhuah khu sorkar tan phurrit a ni a, Chuvangin Sokar thar hmalakna turah chuan Tuirial project ang hian agreement siam kan tum ve lo a ni,” a ti.
Mithar lawmluh hun hmangtu Pu Lalliansawta President, ZPM General Hqrs. chuan,”ZPM Party a vawiin thlenga mithar duhawm tak tak lawmluh tur kan la nei zel hi lawmawm ka ti a, kan Party policy min tuipuitu apiangte chu ZPM Party ah lo haw khawm zel turin kan sawm a ni,” a ti bawk.
