Vawiin ni 16 October hian Congress party chuan Sinlung Hills Council inthlan lo awm tur atan ‘Campaign Kickoff Programe’ Sakawrdaiah YMA Hall, Sakawrdaiah an hmang a, he hun hmanpuitu Pu Lal Thanzara, President, MPCC chuan thu sawi in, ‘Vawiinah hian Sinlung Council huam chhunga mipuite hriat tura ka sawi duh chu, he inthlanah hian Congress party in hnehna kan chan chuan Congress party leh HPC(D) nena kan inremna angin Sakawrdai ah ngei hian headquarters kan bunin hma kan la dawn a ni tih ka sawi duh a ni. Sinlung Hills Council ah hian Congress in sawrkar kan siam anih chuan kan fund neih ang ang te kan hmang tangkai dawn a ni. Chuti chuan Sawkawrdai leh a chhehvel khuate hian pawisa lengvak vel hian in nitin khawsak pawh a tihziaawm kan beisei a ni.
“Ram buai hrehawm zia hre lo thangthar zawk te chuan remna leh muanna hlut zia hi an hre lo. HPC(D) nena inremna te hi Congress sawrkar hmalakna a ni. MNF khan an sawrlar lai khan HPC(D) te pawh khan inbiakna pawh an nei a, mahse pathian malsawm tlak a ni lo nge, a hlawhtlinna hmel hmuhtur a awm lo a ni. Amaherawh chu Congress sawrkar khan remna leh muanna a ngai pawimawh a, theihtawp a chhuahna azarah inremna kha a lo awm thei a ni.
“Chutih lai chuan ZPM hotute chuan kum 30 dawn lai sawrkarna lo chang tawh Congress te engmah ti lo anga an sawi te hian thangthar thil hre pha lo te ngaihtuahna a ti buai a. Mizorama hmasawnna hnathawh za a sawmkua hi Pu Lal Thanhawla kaihhruai Congress sawrkar hnathawh ani.
“Mizorama Hydel Project 12 zinga 9hi congress kutchhuak a ni a, PC hun laiin pahnih siam ani a, MNF hun laiin Serlui B chiah siam a ni bawk. Tuirial te hi an sum duh vanga an tih tawp tawh kha Congrese chuan hman theih in kan siam tha leh a ni. Tuna sawrkarin Tuivai Hydel Project a din tawh pawh Congress sarkar laia kan lo ruahman tawh leh sum pawh awm sa a ni.
“ZPM hi mipuiin an enchhin mek lai hian Centralah pawh an thurualpui leh an kungpui MLA pahnih nei BJP hian an enchhin ve mek a a, BJP MLA te dinhmun leh chanvo hi engtin nge an chinfel dawn an thlir mek a ni.
“Nimin khan helai hmunah kan Chief Minister chuan ‘Mi rinawm lo zui hi in bat niin a lang lo’ a ti a, a dik khawp mai. Vawiin ni ah hian zui tlak loh leh zui ngam loh an sawi dawn anih chuan ZPM hi an tiavai mai ang tih ka hlau a ni.
“Tun inthlanah hian Congress member te thahnem ngai taka thawkho a, kan Candidate te vote tling turin ka ngen che u a ni.” a ti.
Pu Lalnunmawia Chuaungo, Sr Vice President pawhin thu sawi in, “Vawiin ni a rawn kalnte hibSinlung Hills Council hia pian dan hre pha deuh vek kan ni a, helai velah ram a buai a, inkahna te a awm thin a. Chu chu tha ti lovin Congress sawrkar chuan HPC(D) te nen inbiak remna a neih pui ta a ni. Chumi inbiakna ah chuan in duh angin ‘Sinlung Hills Council’ din in duh a, chu chu Congress party chuan a ti hlawhtling ta a ni.
Khatih lai khan sawrkar lamah a buaipuitu ah ka tel ve a, mipui ngaihdan te pawh lak a ni. Sinlung Hills Council area ami te Council huamchhunga mi an ni tur ani a, vote pawh helaia cheng te chauhin an nei tur ani tih chu mipui duhdanin Congress Party chuan san a siam ta a ni.
Mahse tunah chuan Council huamchhung ami ni lo pawhin an rawn chuh thei ta a, chung te ai chuan a huamchhunga cheng ngei, lu phum tur ngei lo thlang rawh u. Congress sawrkar khan a ruahman ang chuan kal se in Council Member ho dawr turin Aizawlah in rawn kal a ngai lovang, Sawkawrdaiah ngei hian in dawr tur a ni. Congress kan sawrkar anih chuanbSakawrdaiah ngei hian Council Member te in dawr thei tawh dawn a ni.
Sinlung Hills Council Headquarters hi sawkardaiah ngei dah tur ani tih kha in duhdan a ni. Chumi atan chuan nuaih 300 dah ani a, Headquarters sakna turin nuaih 150 an dah thlap bakah Aizawlah Sinlung Hills House sakna tur dah anih bakah a hmun tur MINECO ah ruahman ani a, mahse vawin thlengin sak zawk a ni lo a ni. Congress sawrkar kan din chuan heng hi kan ti hlawhtling dawn a ni. Chuvangin Congress Candidate te lo vote tling vek turin kan ngen che u a ni.” a ti.
He hun hi Pu RL Valla, Vice President, MPCC chuan a kaihruai a, Pu Lalremsiama, Group Congress Committee President, Sakawrdai in lawmthu sawina hun a hmang bawk a ni. He hunah hian MPCC, Mahila, Congress thalai leh ADCC atangin mi thahnem tak an tel bawk a ni.