Dated Sakawrdai 15th October 2024 : Zoram People’s Movement Party (ZPM) leh Hmar People’s Convention (HPC) tang dunte chuan Sinlung Hills Council General Election, 2024; 5th September 2024 a lo awm tur atan thawhhona thuthlung, 1st October,2024 a an lo ziah tawh angin vawiin 15th October, 2024 hian Sakawrdai, Saiphai leh Suangpuilawnahte Campaign Kick Off hun an hmang a, he hunah hian Pu Lalduhoma Chief Minister, Pu K.Sadanga Home Minister leh Pu B.Lalchhanzova Supply Minister ten hman puiin thu an sawi a ni.
Chief Minister Pu Lalduhoma chuan, “Tun hmain hun rei tak chhung Hmar mipuite sawrkarin a enkawl danah lungawi lovin ralthuam lekin hun in lo hmang tawh thin a, ralthuamte tunga inremna thuthlung ziah a nih hnuah pawh, chu inremna chu tihhlawhtlin lohin a la awm reng a ni. Chuvangin nghet taka mirinawmlote hnung zui hi in bat niin a lang lo. Phuahchawp takin he council hi hun rei tak a lo kal tawh thin a, chairman pawh an duh duha an thunun theih an dah thin a ni. Sinlung Hills Council-in Dan mumal tak a neih theih nan theih tawpin kan lo au ve tawh thin a, chumi hnuah Rules siam niin, hun rei tak hnuah Act mumal tak kan lo nei ta a, a kalkawng hi a thui em em a ni,” a ti.
Pu Duha chuan, “Tuna Mizoram sawrkar hi mipuite nen tangrual a kan din a ni a, SHC inthlan kan hmachhawn turah pawh hian HPC mipuite nen kan tang tlang leh dawn a ni a, a thlamuan thlak hlein ka hria. He council tan hian sawrkar hmasa hun laiin nuai 150 an pe thin a, a bei tham hle tih kan hriatin Sorkar thar chuan nuai 150 bakah nuai 190 kan pek belh a, chumaibakah Lok Sabha MP Pu Richard Vanlalhmangaiha chuan a MP Fund atangin nuai 75 a rawn theh chhuak tawh bawk a ni. Tin, Sorkar thar chuan, Tuivai lei siamthat hna hi angai pawimawh em em a, hmanraw thar hmangin tunah hian siam a lo ni ta a, he lei hi ei leh bar chawkluhna kawng pawimawh tak leh kan unau Manipur a awmte nen inkalpawhna kawng pawimawh tak a nih avangin kan ngaipawimawh hle a, kawng mai bakah zirna leh hriselna kawnga hmar mipuiten hma kan lo sawn zel theih nan hma lak zel kan tum a, Bana kaih (handholding) Scheme pawh hi kuthnathawtute leh thalai mahni kea din tumte chuan lo hlawhtlinpui ngei turin ka chah duh che u a, Sinlung Hills Council-in hma a lo sawna, leirem a lo rah zel theih nan kan candidate duhawm tak takte hi lo vote tling ngei turin ka ngen bawk che u a ni,” tiin Pu Lalduhoma hian mithar 238 (Sakawrdai-205, Ratu bial-21, Sunhluchhip-12) a lawmlut nghal bawk a ni.
Suangpuilawn ah pawh Campaign Kick-Off hun hman a ni a, he huna thu sawitu Home minister Pu K. Sapdanga chuan, “Kan ram hmasawnna turin veng leh khuate, area bikte inrelbawlna hrang hrang kan nei hlawm a, hengah te hian hruaitu thlanna neih a tul ṭhin a, inthlanah te hian state-a rorel mek te nena thawhona tha nei thei tur te, ngampa taka khawtlang leh council mamawhte thlen theitu turin sorkar-na fawng chelh mek party te thlan thlantlin hi a finthlak hle a, tun ṭum council inthlanah pawh chutiang thil chu a thlen kan beisei a ni. Thawh hona a ṭhat loh chuan hmasawnna hnuhchhuah turte pawh a muang ṭhin a, mipuiin kan tuar a, hruaitute tan pawh a hrehawm ṭhin a ni. Chuvangin hun inher mila vote pawh inthlak thiam ngei ka ring a, ZPM leh HPC candidate-te in lo thlan tlin ngei kan duh tak zet a ni”, a ti. Mipuiten hnathawh kawr min hak tir aṭangin kan ramah kalphungthar kan hmu chho zel a, kalphung hlui tam tak, kalphung tharin kan thlak chho mek a ni. Tin, In leh Lo ropui tak tak din ringawt hi hmasawnna ber a lo nih loh zia chu kan state hriselna dinhmun en hian a hriat awm e, Mizo mipate kan thi nasa em em a, nasa leh zualin sorkar, khawtlang, Kohhrante pawh ruihhlo dona kawngah kan ṭan mar pat a ngai a, chutianga kawng tinrenga hmasawn tur leh Sorkar tha leh chak tak kan neih zel theih nan, kan candidate tha tak takte hi min lo vote tlin sak ngei turin ka ngen a che u,” a ti bawk.
Sinlung Hills Council inthlan lo awm tura campaign kick off hi Saiphai khua-ah pawh BNRGSK Hall-ah neih a ni a, he huna thu sawitu Supply Minister Pu B.Lalchhanzova chuan, “Ram rorelna a kal dik chuan ngaihsak loh bik, thlauhthlak bik an awm tur a ni lo a, Sinlung Hills Development Council inthlan lo awm tur ah pawh hian Development Council mipui hmangaihtu kan thlan chhuah ngei ka beisei ani. Ram zahawm leh hnam zahawm kan nih theih nan ram pumah ration card siamthat hna kal pui mek a ni a, kan veng leh khua theuhah tute chhungkua hi nge tanpui mamawh zual bik ti a thlei bik neilo a Ration Card endik hna hi kan kalpui ngam angai ani. Ration Card dik kan neih chuan kawng tam takah kan state hian hma kan sawn phah dawn a ni. Miharsa zawk ration card vâra awm mêk ration man thara khulte lo mangang lo se ka duha, sawrkâr chuan theihtawpin a en fel chho zel a, ZPM sawrkâr chuan a tih dik hna a thawk zêl dawn a, retheite tawrhna a en fel chho zêl dawn a, ram siam that meka a awm lai hian tawrhnate a awm ṭhin a, kan ram hi a ṭha zawngin a insiam mek a, he tih chhûng hian tuar chhel takin i awm ang u, rethei te hmangaihtu sawrkar ZPM hian tih dik hna a thawk zel dawn a chuvangin SHC inthlan lo awm turah pawh hian kan candidate-te lo thlangtling ngei turin ka sawm a che u’, a ti.
Vawiina Campaign kick off hun hmanna hmun thumah hian ZPM General Headquarters hruaitute leh Hmar People’s Convention hruaitu thahnem tak an tel a, Sinlung Hills Council General Election lo awm tura thawk dun ZPM Party leh HPC te hian SHC-a bial 12 awmah candidate tur an ruat fel vek tawh bawk a ni.