Aizawl Dated 14th October, 2024 : Vawiin 14th October, 2024 hian ZPM chhûng inkhawm chu ZPM General Headquarters Office, Republic Vêngah neih a ni a, he huna thusawitu Pu Lalthansânga (Chate-a), Minister, EF&CC Department etc chuan, “Kum 40 dawn sawrkâr lo kal tawh dan hi thawk leh khata thlâk hlawk theih ni lo mahse, zawi zawiin a insiamrem chhoh zêl a, inrenchemna kawngah sawrkâr a kal nasa a, sawrkâr officer-in office a TV an kawl theih dânte leh kalphung ṭhenkhat dangte pawh siam ṭhat zel niin, sawrkâr hi zawi zawiin kawng dik lam panin a inher mêk a ni”, a ti.
Pu Lalthansânga chuan sawrkârin uluk taka sum a enkawl thu sawiin, “Sawrkar hmasain April-August, 2023 chhûnga a sum pûk chu Rs Vbch 1936.4 a nih laiin, ZPM sawrkârah April – August, 2024 chhûnga sum kan pûk zat chu Rs Vbch 977.7 a ni a, ZPM sawrkarah erawh chuan hun bi in ang rengah kan lei bat zat chu cheng vaibelchhe sâng chuangin sawrkâr hmasa nen a inthlau a ni”, a ti.
Sericulture Department changtu Minister Pu Châte-a chuan sawrkâr tharah phai lam mithiamte pawh an phur hle a, mithiam-te’n hmasawnna hna thawh kawnga kut rawn thlâk an châk thu sawiin, “Central Board of Silk Conclave pawh sawrkâr tharah Mizoramin kan thleng a, Guwahati khawpui tih lohva India hmarchhaka a thleng hmasaber kan ni”, tiin, Pu Chate-a chuan “Muga (Pangang chikhat) Project-ah pawh benefeciaries 500 vel thlan an ni dawn a, Mizoram chauh hi India hmarchhaka Muga khawi theihna awm chhun kan ni”, a ti.
Pu Chate-a chuan, “Rubber President of India meuh pawh Mizoramah a rawn zin tawh a, tunah hian Chief Minister Rubber Mission chu kalpui chhoh ṭan niin, Zirtiri Residential Science College hmun hluiah Training Centre buatsaih a ni dawn a ni” tiin, “Mizorama sangha thar tam theih dan tur zirtirna neiin phai aṭangin mithiam rual pawh vawi thum lai an lo kal tawh”, tiin Fishery Department changtu Minister Pu Lalthansânga (Chate-a) chuan phai lam mithiamte’n kal phung thar sawrkârah beisei an neih san thu a sawi.
EF& CC changtu Minister Pu Lalthansânga chuan “NEC atangin kuhva scope leh a ro siamna tur project min rawn pe dawn a, country of origin certificate dik tak Mizoramin kan pe tawh dawn a ni”, tiin, ZPM sawrkârah kuhva tawlh rûk a kim kit thu a sawi bawk.
Pu Chate-a chuan, “Tawngtaina nena sai ip puan sina kan dilnate Pathianin min chhâng a, Mizoram hian kawng dik a zawh ṭan a, kan ṭan hona leh Pathiana kan tluk luhna hian awmzia a nei ngei ang”, tiin ṭangho zêl turin party mipui kalkhawmte a sâwm a ni.