Vawiin ni 11 October, 2024 hian Congress Party chuan Congress Bhavan-ah ‘Friday Political Session’ an hmang a. He Friday Political Session ah hian Pu Lalbiakzama MPS(Rtd), General Secretary, MPCC chuan thusawiin, “HPC nen hian kum 1994 ah Pu Lal Thanhawla kaihhruai Congress sawrkar laiin inremna kan lo nei tawh a, mahse kha inremna kha chhan hrang hrang avangin a tluantling ta lo va. Kum 2018 April ni 2 ah Pu Lal Thanhawla kaihhruai sawrkar lai bawkin HPC(D) nen inremna tluantling kan lo nei ta a, silai tha tak tak te an tung a ni. He inremna kan lo neih takah chuan interim sawrkar kan din ta a ni. He inbiaknaah hian khatih laia Congress sawrkar khan a hruaituah min ruat a, a lehlam lehlamah inremna kan duhtlang a, tha takin kan inrem ta a ni.
“Kha kan inremna anga interim sawrkar kan din kha MNF an lo sawrkar khan thlak an tum ta a, kei chuan buai leh theihna anih avangin ka lo dodal a ni. Sakawrdaia SHC Building tur pawh sum an neih loh avangin MNF sawrkar khan an sa zo thei lova, chutih laiin thil tul lo tak Airport tihlen nan chuan sum tamtak an hmang thei tho si a ni.
“Sinlung Hills Council hi kan kutkawih anih avangin a neitu nihna rilru kan pu a, Congress party chuan kan duat dawn a ni. Chu chu Sinlung Hills Council area ami te pawhin hria se kan duh a ni.
“Kan Boundary te khu kan vei a, kan sawi thin. Tunah khuan kan boundary a la che lova, engmah a la danglam lo a ni. Boundary chungchangah kan tana tha turin ngaihtuahna seng ila, dinna nghet kan neih a ngai a ni. He kan ramri buaina hi tharum nen, inkahna nena chinfel chi a ni lova, inbiakna nena chinfel chi a ni.
“Mahatma Gandhi kha dikna duh vanga tuar ngam a ni a, ka ngaisang a ni. ‘Rorelna dik’ kan sawi thin a, ‘Dikna rorel’ ti ila a dik zawk em? Keini Mahatma Gandhi ideology kalpuitu Congress party hian dikna rorelna kan kalpui ngam ang em? Kan chenpui hnam tenau te lakah hian dikna rorelna kan kalpui ngam ang em tih hi kan inzawh a ngai a ni. Thil diklo hi kan enliam mai dawn em? Delhi tlanga kan zah thinna leh hnar kan hmuh len thinna chu kan vai Officer leh sumdawngnte lakah pawl thenkhatin donation an khawn thin hi a ni. Donation chu khawn thiang a ni a, mahse an pek phal tawk kha pawm se a tawk mai a, a bak phut chhuah leh hi thil dik a ni lo a, dikna rorelna a ni thei lo. Hei hi kohhran leh YMA thlenga kan dodal ngai a ni.” a ti.
Er. Sanghrima Chawngthu, Secretary, MPCC pawhin thu sawi in, “Mizote hi kan politic a thangduang em em a, tunah chuan rulling pawhin term hnih sawrkar an inbeisei ngam tawh lo a ni. A chhan chu mipui pawh kan changkang tawh a, sawrkar kaldan leh an thiltih thlengin awlsam takin ka hre zung zung tawh a, ngaihdan kan siam zung zung thei tawh a ni.
“Tunah hian ZPM laka beiseina nei sang em em thin te pawh an beidawng tan tawh a, Congress sawrkar kha an lo fair ber an ti leh tan tawh a ni. Chuvangin Sawrkar tha, kalpung dik mipui tana chhawpchhuak turin Congress mipui ten rilru i siam thar ang u” a ti.