Vawiin ni 11, October, 2024 Zirtawpni hian MNF party chuan Mizo Hnam Runah chhung inkhawm an nei a, Former Deputy Speaker, Pu H.Biakzuava Ex.MLA chuan thusawiin, ZPM Sawrkar chu enchhin sorkar an nih angin thla 10 kan enchhin tawh a, an la che chhe hle a, tun ang zela an kal chuan an tuarchhuak thei in ka ring lo, a ti.
Kawngchhiat em em laiin Tuialhthei man an tipung te hi thil inhmehlo tak a ni a, an tuarlo tura ngaihte pawhin an tuar zel a, kan Driver te pawhin MNF sorkar kha an ngai hle niin an sawi a. ZPM chu an opposition laia an insawi ang niloin ruling-ah chuan an lo danglam hle a, opposition atan khan an tha ber a ni, a ti bawk.
MNF Adviser chuan, sorkar thla 10 leka upa ah chuan mipui sawisel nasat ber tum ala ni, a chhan chu tih tura an sawi an tih loh leh, tihloh tur an sawi an tih leh si te a ni a, kalphung thar a awmlo a, an thil thar tih ve pawh a thalo lam zel ala ni. Bangla pawh kan la chhuahsan hma hma in an rawn ri nghal bur bur mai a, ka’n zawhchian nak chuan ZPM MLA te bangla chei tha tur thawm alo ni a, kalphung thar hi a letlingin a kal mek a, mipui bum nan thu tha tak tak an rawn sawi a, mahse an sawiloh ang hlirin an duh ang chu an kalpui hmiah hmiah a, kalphung thar niloin *Duhphung thar*, ka ti a ni, a ti.
Ex-Dy. Speaker chuan, LADC a kan MDC te an thawhhona a tha, kan sorkar leh zelna tur pawh thui tak a innghat a ni. Kan MDC ten theihtawp an chhuah zel a, LADC ah inpawhna a na hle a, kan vaia tanrualna in rah tha a chhuah zel ka beisei a ni, a ti.
Pu Biakzuava chuan, opposition nih vanga sorkar sawisel reng tur a tul ber lo a, amaherawhchu, kan ram leh hnam leh mipui tana tha lo chu kan sawisel zel dawn a. ZPM sorkar hi ka hriat ve chinah rualkhailo ber leh chhim lam ngaihsak dertu awmchhun an ni a, mipui pawhin an sawi duh tan hle a ni, tiin, Chhim lam MLA te hi chanvo pawimawh chang tura ‘fit lo’ leh a ngaihna hrelo hlir em ni an nih? Nge, an chhungkaw inhruipawhna hi an la chhunzawm zel zawk? tih hi ka zawhna a ni, a ti bawk.
MNF Adviser chuan, mi chet chhiat changa lo phul luai ai chuan mar pata tan lakna hi a pawimawh a, tumah sorkar reng tur an awmlo ang bawkin, tupawh sorkar thei vek kan ni. Chuvangin, kan sorkar laia kan tihsualte inpawm a, in siamthain sorkar leh turin kan hruaitute hnungzui zelin, tan ila zel ang u. MNF party aia sorkar leh tura structure lian leh organisation tha an awm lo, midang tih tura dah mai lovin, Pathian leh kan Ram tan hmalam panin i kal zel ang u, tiin party mipuite a fuih bawk.