Joint Action Committee, Land Owner’s Association, Kolasib District chuan thuchhuah siamin, “Kolasib District mipuite hian kum 3 hma lam atang khan ram inchuhna avangin buaina leh harsatna kan lo tawk tawh a, hemi chungchangah hian State sawrkar pawh tum engemawzat kan lo dawr tawh a, amaherawhchu, vawiin thlengin he harsatna hi chinfel ala ni ta chuang lo a. Chuvangin Kolasib District Land Owner’s Association Joint Meeting chuan kan lungawi lohna lantir nan leh kan dikna leh chanvo humhim nan hreh tak chungin NH 06& 306 (Silchar – Aizawl road) hi dan (Block) nise tiin a rêl ta a ni,” tiin a hnuai ami ang hian ruahmanna an siam.
Road Block neih tanni tur : Dt 25 Sept 2024, Dar 06 : 00 am a\angin thu leh awm hma.
Road Block na hmun tur : RTP Farm Sethawn.
ROAD BLOCK NEIH TUM CHHANTE
1. Ram neitu nihna (Ownership of Land) hi sawrkar in chingfel vat rawh se.
2. RRF Notification 1965 hi ram hmasawnna daltu a ni a, thiah ni rawh se.
3. Four Lane Project hi tihhlawhtlin ni rawh se.
4. Kum 3 chuang hma la thei lova kan ram min khuahkhirhna (Freezing Order) hi sawrkarin sut rawh se.
I. A tir atanga kan buaina ber chu Forest ram leh mimal ram inchuhna hi a ni a, vawiin ni thleng pawhin chu chu kan mu tan a la ni reng a ni. Tunhma atangin Forest Department hian Vairengte – Sairang inkar kawngpui dung (a kam tawn tawn 800 mtrs.) hi Roadside Reserve Forest a ni tih hi mipuiah an puangzar ngai lova, Reserve Forest a nih angin an cheibawl ngai bawk hek lo. Kolasib District khaw hrang hrang a chengte ngei pawh hian Reserve Forest chhungah an awm tih hi kan hre ngai lo. Kan pi leh pute hunlai atang tawhin In hmun, huan lo ram te neiin kan in beng bel a, Forest Department atangin harsatna engmah kan tawk ngai lo. Tin, Revenue Department pawhin In hmun leh Ram Pass/ Permit a pe chhuak reng bawk. Amaherawhchu tun hnaiah Four Lane kal tur avangin Forest Department chuan CA/NPV Compensation an duh vangin RRF Notification 1965 tlawhchhanin Vairengte – Sairang inkar hi Roadside Reserve Forest tiin ram an rawn chuh buai thar leh ta a ni.
Kum 2021 ah High Court-in RRF Notification 1965 chu dan hman tlak loh leh awmze nei tawh lo, mihring chenna hmun In leh Lo in a khat tawh tiin a lo thiat a. Court-in a zir chiannaah he RRF Notification hi dan dik lova an puan a ni a ti bawk. Forest Department chuan High Court-in a hnawl tawh hnuah leh mipui tan pawh harsatna siamtu a ni tih hre reng chung siin tih nun leh tumin a bei ngar ngar a.Tunhnaiah Environmental NGO te punin Supreme Court-ah an Appeal leh a, chu chu State Sawrkar pawhin thlawpin he RRF hi Stay an dil zui ta a ni.
Tun dinhmunah Vairengte – Sairang inkara cheng mipuite hi he dan avang hian kan him lova; Kan In, Kan huan, Kan ram ti a kan lo cheibawl te hi Forest in min chhuhsak mek a ni. Reserve Forest chhunga chengte hi dan lova awm, hnawhchhuah theih reng kan ni. Chuvang chuan State Sawrkar hian Kolasib District mipuite dinhmun (Status of Land) hi a rang lama a chinfel vat a ngai a ni. Mipuite zawhna ni ta chu; Engvangin nge tun thlenga Forest Department hian Central Ministry of Forest lamah Reserve Forest hi an enkawl leh cheibawl lai mek anga Report an la pek reng tih hi a ni. Kolasib
District hi Reserve chhungah awm reng se tihna rilru kan Sawrkar, Forest department leh NGO ten tun thlenga an la pu tlat mai hi a mak kan tiin District mipuite rah beh tumna ah kan ngai a ni.
II. RRF dinchantir tuma hmalakna awm mek hi Land Owner te chuan pawi kan ti tak zet a, he dan avanga mipui leh ramin hmasawnna kawngah harsatna kan tawh zozai te hi hriain thuneitute pawhin De-notify tir tura hma an lak hi an tih makmawhah kan ngai a ni. Zoram mipuite pawh hian RRF hi ram thanmawhbawk a ni tih hriain paih thla turin i tang tlang theuh ang u.
III. Kawng dinhmun kan enin Zoram hian kawngpui \ha kan mamawh tak zet a, tuna 4-Lane kawngpui an sial tur pawh hi Land Owner te chuan \ha kan tiin kan thlawp tlat a, tipuitling ngei se kan duh tak zet a ni. Hemi atan hian kan ram pawh ui chung chungin ram hmasawn nan tiin kan pe a ni. Forest in an enkawl loh ram inthiamlohna nei miah lova kan ram a ni ti a an hauh tlat mai hi bansan tawhse la, Zoram pawhin hma kan sawn phah ngei ang.
IV. Kum 2020 atangin Four Lane ram lak tur avangin Sawrkarin kan ram hi khawih theih lovin min khuahkhirh (Freeze) sak a. Chhungkaw tam takin eizawn nan a kan hman kan huan thlai te enkawl zui thei lova min siam hi kan mangang tak zet tawh a, Kan ramah hmathar lak a rem bawk si lo a, min khuahkhirhsakna man zangnadawmna min pe bawk
si lova; hei hi Ram neitute chem lo a lu in laksakna dik tak a ni. Land Owner te dikna leh chanvo hi rahbehsakin kan awm mek a ni. He buaina hi State sawrkar hian a chingfel thei lo a nih chuan 4-Lane hi cancel tir mai sela, Kum 3 chhung kan ram kan enkawl theihlohna man erawh min pek ngei kan phut tlat a ni.
A tawp berah chuan vawiin niah Land Owner ten kan dikna leh chanvo nawr chhuak tura Road Block hial a lo ngai ta hi pawi kan ti a, Zoram mipuite hriatthiamna pawh kan ngen tak meuh meuh a ni.