Vawiin 17th September, 2024 (Tuesday) hian BJP Mizoram chuan BJP Mizoram State Office, Mipui Run, Upper Republic ah “SEVA PAKHWADA WEEK, 7TH SEPTEMBER – 2ND OCTOBER” pualin Blood Donation Camp an buatsaih a, mi 17 laiin mamawhtute hman turin Civil Hospital Blood Bank tan thisen pe in, Blood Bank-a thawk te’n BJP State Office ah thisen hi an lak sak a ni.
Blood Donation Camp pual inkhawm tawi neih ah hian, Blood Bank Officer Dr. Zohmingliani chuan, “BJP Mizoram te’n midang tana luanchhuahna hun kum danga in lo neih tawh angin vawiinah hun ṭha tak inbuatsaih leh hi a lawmawm kan ti em em a, vawiina thisen hlu tak a mamawhtute tana kan pek hmang hian mi tam tak nunna hlu tak kan chhan chhuak ngei dawn a, Pathian thua kan hmuh angin, thil ṭha ti atana Pathianin min siam angin, vawiin hian thil ṭha in ti a ni,” a ti a.
Dr K Beichhua, MLA, State Core Group Member pawhin thusawiin, “vawiina Prime Minister Pu Narendra Modi piancham lawmna pual leh midang tana luanchhuahna hun kan hman mekah Blood Donation Camp kan buatsaih leh thei hi a lawmawm hle a ni. Blood Donation hi a pawimawh hle a, kan thisen hian nunna tam tak a chhanchhuak theiin, thisen mamawhtu dinhmun a din chiah hian thisen kan pek hlutna hi a chiang ṭhin a ni. Mizoramah hian mi tlawmngai tak tak te’n thisen an pe ṭhin a, nimahsela mamawh tu kan tam êm avangin Blood Bank lam pawh hian duh khawp an nei thei bik lova, chuvangin thisen pek hi uar zel ila, kan thisen hian dam chin a neih avangin thisen kan pek hian kan hriselna atan a hlauhawm lova, thisen kan pek avangin mi dang nunna hlu tak kan chhanchhuak thei a ni,” a ti bawk.
Pu Vanlalhmuaka, State President pawhin thusawiin, “kum dangah pawh Midangte tana luanchhuahna hun, kar khat chhung kan hmang leh dawn a, vawiin ah erawh kum dang aiin thisen pe kan tlem deuh a. Vawiina ka sawi duh pakhat chu BJP kan nih chhan hi kan chian a ngai a, Central-a kan hruaitute’na min chah t/ṭhin chu, in hnam leh sakhua ah in rinawm tur a ni, hnam leh sakhuaa in rinawm loh chuan Ram rawng in bawl thei lovang min ti a, Mizorama Political party hrang hrang te’n Central-a kan hruaitute’n thu min chah ṭhin hi kan inenfiah nan a pawimawh hle in a lang. Kan hnam leh Sakhua, leh Kristianna ah hian kan rinawm em? Kristian tih awm rengin Ram rawng kan bawl em? Ram kan kaihhruai em? tih hi kan inzawhna tur a ni. Chuvangin Kristian kan nih anga Ram leh hnam rawng kan bawl loh chuan kan ram hian a chhiat phah zel dawn a ni. BJP te kalphung leh hnathawh dan te Mizoram mipuite’n min hriatpui ula, Kristianna nen pawha inhmeh êm êm zawk a ni,” a ti bawk.