Vawiin September ni 11, 2024 (Nilaini) hian Central YMA Hall, Tuikhuahtlangah Young Mizo Association Central Co-ordination Committee (CCC) Meeting vawi 100-na neih a ni a. He hun hi TV. Lalhmachhuana President, Central YMA chuan kaihruaiin, member kal dan hetiang hi a ni a, Central YMA OB -6, CEC-51, Sub Hqrs- 35, Group-’63, Branch- 95 member kal zawng zawng 250 an kal a ni.
YMA Rorel Inkhawm ni 24.10.2024 hian R. Dengthuarma Indoor Stadium, Mualpui, Salem Veng-a neih turah Agenda tur vawiin dt.11.9.2024 rorelna a, chhawpchhuah YMA Khawih leh Sawrkar 28 zingah 16 thlitfim a ni.
YMA khawih thlitfim-11
1. Faina leh thianghlimna kawnga hma kan sawn theih nan CEC bawihhlawh paih dan inzirtirna neih ni rawh se.
2. Plastic bur/bottle-in kan ram a tihchhiat nasat avangin, a hman tlem dan inzirtir leh thil danga hman tangkai dan kawng zawn ni rawh se.
3. Kumtin a Furpui a lo thlen dawnin hemi kentel chhiatna hrang hrang laka lo inven lawkna turin ‘Fimkhurna Hapta Thla’ ram pumah hman thin ni rawh se, tih chu kal zel atan tha kan ti e.
4. Mizoram chhunga NHIDCL hnuaia Mizoram kawngpui siam mek hi a thawmthat leh a chhe zel tur ven kawngah a tul angin Central YMA in hma la in, vilzui zel ni rawh se.
5. Thingzai hi phalna mumal tak nena zawrh a nih theih nan Central YMA in a theih ang angin hma lak zel ni rawh se.
6. Ruihhlo Do kawngah YMA in tun aia chak zawkin hma la rawh se.
7. Mizo tawng humhalh kawnga YMA hmalak mekna hi chak zawk a kalpui ni rawh se.
8. Central YMA Hla bu siam hi chhut thar/ennawn ni rawh se. CEC kutah dah ni rawh se.
9. YMA Inkhawmpui Lian neih loh kumah Inkhawmpui neih ni rawh se.
10. YMA Rorel Inkhawm hi tun aia zangkhai zawka kalpui dan zawn ni se.
11. Kan State chhunga Company hnathawktu leh mi dang CSR pe chhuak thei te, an Corporate Social Responsibility (CSR) hi kan ram chhung ngeiah an hman theih nan leh ram leilung faten tangkai zawka kan chhawr dan tur zawn ni se.
Sawrkar Khawih thlitfim- 5
1. Mizorama raltlante awmna hmun tur, enkawl dan tur leh kaihhruaina: mumal, tak Sawrkar-in siamin, khauh takin kengkawh zui rawh se.
2. Mizoram Lok Ayukta hian thubuai chhuitu tur Investigation Agency hranpa a neih theih nan hmalak ni rawh se.
3. Tunlai a School thenkhatin Pawl 4 thleng a Mizo subject an la zir mumal lo hi Sawrkar-in hma la rawh se.
4. Mizoram Education (Establishment & Management of Private School) Rules, 2006 (Elementary- Higher Secondary School) hi a tul anga siam thain, ennawn ni CEC rawh se.
5. Mizoramah Prosecution Directorate hran siam ni rawh se.