Tunlaia mitin ngaihven leh sawi hlawh ber pakhat chu Dt 26,06,2024-a Dr.KC Lalmalsawmzauva, Assistant Professor, MZU, Kal Phung Thar(KPT) sawrkar-a Adviser to Chief Minister (Handholding Policy) chuan Sawhthing Grade ‘A’ manah Rs 50/- chu Support price atan bithliah fel anih tawh bakah Sawrkar pawhin a buaipui tur thu a sawi laiin, Grade ‘B’ lampang ho erawh Society leh a leitu turte kuta a awm tur thu a sawi hi a ni. Hemi tuma awm Agriculture Minister Pu PC.Vanlalruata thusawi atangin Agriculture Marketing System mumal tak kal chhohpui an tum thu leh heng Aieng, Hmarcha, Hmunphiah leh Sawhthing hoah Support Price siam a nih tur thu hriat a ni a, beiseina a sang hle a ni.
Sawhthing hi kan hriat angin kan ramah hian a tha duhin a thar lah kan thar tam viau thin a, kan hralh that kum chuan kan lawm em em a nimahsela, a hralhna a awmloh vek vek chuan cho lovin kum 2/3 thlenga han dah mai/leia phum chang kan nei thin. A hralhna lam bakah tam thei a nih vang hian Sawhthing chin hi RISK a sang em em mai a amaherawhchu, mi nawlpuiin kan chin theih a nih bakah tih fuh kuma kan awkna tham a ken tel vang hian kumtin hian Sawhthing chingtu hi kan thahnem viau thin tin, kan politics ah pawh hmun pawimawh tak a luah pha a ni. A bik takin tuna KPT sawrkar hian Sawhthing hi an auhla bera an hman a ni bawk a, sawrkarna an han chelh ta bawk nen Sawhthing hi Mizoram ah Kuthnathawktuten an ling nasa leh zual a ni.
Awle, Support Price hi Grade ‘A’ tan chauha Sawrkarin dah/cover a han tum hi kawng thenkhatah thatna a awm theih rualin a felhlelin an hmanhmawh lulai deuhin a hriat a, Sawhthing chingtu hi an pung nasain an chinna leilung pawh a in ang lo nasa hlawm dawn a; tuna hetia Grade ‘A’ chauh buaipui chhoh tumna boruak hian kuthnathawktuteah rilru hahna leh buaina nasa tak a thlen thei a ni-RISK nasa tak hnuaia hma la an ni tih theihnghilh loh a tha. Chutiang zelin Grade ‘B’ leh a dangte chu hlam chhiahin Support Price hian a tuam/cover dawn lo an ti leh nghal, a buai chho tulh tulh mai. Support Price kalpuina tura Budget-a dah fel vek tawh hian Grade ‘A’ chauh lo a tul dan azir a Grade ‘C’ thleng a awm anih pawhin tuam/cover tir mai rawh se, Kal Phung Thar sawrkar hi Grade ‘A’ Voters chauh te vote vanga tling an ni bik lo ve.
Tin, Sawhthing Grade ‘A’ bik tana Support Price Rs 50/- per 1 Kg a bithliah a ni pawh hi tunlai sum hlutna tlahniam mek zel en in a hniam/tlawm mah mah a ni, a Chi man pawh a to chho tawhin a vang phian leh nghal a chuvangin, Grade ‘A’ manah hian a lo berah Rs 70-80 tal ni rawh se. Sawrkar hian vanneihthlak takin Sawrkar liam ta a SEDP sum sem hman loh thahnem tak kha an rochun a, sum pawh hi an nei viau tur a ni. Hetia Sawhthing mana Rs 50/1kg chauh thehchhuah an tum thu han hriat hian ngaihtuahna a ti thui khawp mai, tunlai chhoah Rs 50/- hi chuan Grade ‘A’ chin ngat phei chu Vaihovin an lei ngam sa hmel a ni. Support Price a man hniam tak siam hian a hlut tur angin a hlu lo thei tlat, a chingtu te aia a leitu lam ngaihpawimawhna a lang lian zawk sa lur mai.
Han ngaihtuah thui deuh phei chuan Hmunphiah chungchanga an hmalak dante enin Sawhthing a Support Price kalpui an tum dan hi a hlamzuih mai ang tih a hlauhawm. Chuvangin, hnawhsarum taka kalpui ai chuan Regulated Market te din fela a tul anga Kuthnathawktute hnena Agriculture Marketing system lama inzirtirna(awareness campaign) neih phawt te a tha zawk awm e. Tin, mi rinawmlo tlemte avanga Kuthnathawktute zawng zawng hmer tela mi rinawmlo ang hrima kan hotuten an sawi pawh kha thil awmlo tak a ni. A sang/Sing/Nuai bi chinah chuan mi han fel zan lo deuhte chu an awm ngei ang mahse, he Mizoram ei leh bar mamawh tharchhuak thei tur khawp Kuthnathawktu rinawm tam tak ala nei a ni.