Vawiin 16th April 2024 (Thawhlehni) khan Mizoram Pradesh Youth Congress Committee (MPYCC) leh Lunglei District Youth Congress huaihawtin Lunglei District Youth Congress Workers Meet, Congress Bhawan, Lungleiah hman a ni a, he hun hi Laltawnliana, President MPYCC in a hmanpui a, Zodintluanga Ralte, Ex-Ministser leh Meriam L. Hrangchal, Executive member, MPCC ten thu an sawi bawk.
MPYCC President Laltawnlian chuan, Kumin 2024 Lok Sabha MP inthlanpui hi inthlanpui dang ang a ni lo. Kan hnam, kan sakhua awm zel dan tur inthlanpui pawimawh bik a ni a, Thlarau indona a ni. Danglamna siam turin khawi lamah nge vote i thlak dawn? Tih sawiin, Laltawnliana chuan, India ramah mipui 1,438,911,020 kan awm a, heng zinga 2.3% hi Christian kan ni. India ramah Kristian State 3 (Nagaland, Mizoram, leh Meghalaya) chauh kan ni a, BJP in an target ber kan ni mek. India ram hmun hrang hranga Kohhran te chuan, kumin 2024 MP inthlan hi Kristian leh RSS inbeihnaah an puang a. Mizorama Kohhran hrang hrangte pawh Kristiante hmelma Hindu lal ram din tumtu BJP paihthla turin ka sawm che u a ni, a ti.
Pu Laltawnliana chuan, Union Finance Minister Nirmala Sitharaman-i pasal Parakala Prabhakar chuan, Narendra Modi chu mahni thu chauha rorelna kalpui (Dictator) thin. India ram mipui, khua leh tui te dinhmun pawh ngaihtuah tawk lo, tiin a sawi hial tih sawiin, BJP sorkar chhungin ram Economy pawh kum 20-25 liam ta dinhmunah a kir leh a, India ram hlutna leh theihna pawh Independence hma dinhmunah ang mai a ni a, kum 1818 hunlai, sakhuana leh khawtlang nunphung inkaihhruai dan mumal loh hunlai ang chiah a ni leh tawh. Kum 2024 a BJP a sorkar leh chuan India ram hi Ladakh leh Manipur ang a ni ang a. India ramah General Election hi kan hmachhawn leh tawh an rinawm lo. Chuvangin Mizoram mipuite hi thlamuang taka awm mai mai thei kan ni tawh lo, kan hnam, kan ram, kan sakhua hmalam hun atan danglamna kan siam ngei ngei a ngai, a ti.
Pu Laltawnliana chuan, Party party kan sawi ve hman lo. AAP pawhin an party bil an sawi hman lo, Zoram Decentralisation Front pawhin Congress Party Candidate Pu Lalbiakzama an thlawp vek tawh. Kohhran leh pawl hrang hrangin BJP na taka kan do rawn laia BJP thawhpuitu leh BJP thiana siam tum MP Candidate kan nei hi kan ram kan hnam leh kan sakhua zah lohna leh pawisak lohna ani. Kristian sakhua humhim duhtute lamah nge I tan dawn Hindu sakhaw vuantute lamah, a ti bawk.
Pu Zodintluanga Ralte chuan, Kan ram, kan hnam, kan sakhua dah hmasa ngam Party chu Mizoram tan a pawimawh ber tih sawiin, duh duh sawi a, mahni thusawi tawh leh sawi leh tur in kawkalh zel sorkarna hnuaiah engmah danglamna hmuh tur a awm lo, tih sawiin, Kohhran pawhin kan sakhua humhim a tul an ti takzet tawh laia BJP nena thawh dun zel tum leh mahni thutna lam tur pawh la hre lo, BJP thiana siam tum MP neih a him lo. Chutiang atana thawktu tur MP Pu Lalbiakzama thlan tlin chu Mizoram hmalam hun atana tihmakmawh a ni, a ti bawk.
Meriam L. Hrangchal chuan, Central-ah MNF leh ZPM a awm lo. Congress leh BJP chauh thlan tur an awm? Mizoramah enchhin sorkar kan nei tawh. Central-ah erawh Kristian sakhua humhalh duh Congress kaihhruai INDIA leh Hindu sakhua chawilen tum BJP (NDA) a ni. Khawilamah nge I tan dawn?, Chanchin tha zau zawka kan hril leh theihna turin Pu Lalbiakzama thlan tlin a ngai, a ti bawk.
