16/04/2024 : MPSC hnalak hrang hrangah diklo tam tak a awm avangin, MZP chuan MPSC Chairman chu mawhphurhna laa bang turin a phut a. MZP ngenna in awmzia a neih loh avangin vawiin ni 16 April, 2024 (Thawhlehni) hian a ni hnihna atan MPSC Office kawtah zirlaite an pungkhawm chhunzawm a.
MZP chuan zing dar 8 atangin MPSC Office kai tur an dang ṭan a, MPSC hnathawktute tumah office kal luih tum an awm lem lo a, boruak muanawm tak hnuaiah hun hman a ni. MZP chuan chawhnu dar 2 khan MPSC Office kai tur dan hi a titawp rih a ni.
MZP hruaitute chuan hmalak chhunzawm zel dan tur ngaihtuahin a thukhawm a, Mizoram sawrkar Vigilance Department-in MPSC hnalak dana thil fello awmte chhuitu tur Inquiry Officer (I.O) atan Pu M. Lalmanzuala IAS (Retd.) Mizoram Chief Secretary leh MPSC Chairman lo ni tawh a ruat hi lawmawm a ti hle a. Dikna duhmi, mi huaisen a nih avangin MZP chuan Inquiry Officer hi a ringtawk a, ngun takin a hmalak dan a ngaichang dawn a ni.
Inquiry Officer-in zalen taka hna a thawh theih nan leh, chak zawka hna a thawh theih nan MZP chuan MPSC Office kawta punkhawm chu neih chhunzawm rih loh nise a ti a. Chhui chianna hna thawh a nih chhung chuan, MPSC Office chu khar a, tumah hna thawk lo turin MZP chuan thuneitute a ngen nghal bawk a ni.
