Party President ka nihna angin inthlana kan chak lohna hi ka mawh a ni : Lalsawta

Mizoram Pradesh Congress Committee chuan vawiin January ni 24.2024 (Nilaini) khan Sibys Farm, Mualpui ah Kumthara party intuaithar leh in fuih tharna hun an hmang.

Lalsawta, President MPCC chuan thusawiin, Mizoram enkawltu tur thlannaah sorkar tha siam turin rim takin kan thawk a, mahse Mizoram mipuiin enchhin an duh a, an enchhin phawt loh chuan an dam dawn loh avangin ZPM chu enchhin turin an thlang a, sorkar tha siam turin ram mipuiin an beisei a, keini pawhin kan beisei, a ti.

Lalsawta chuan, kan beisei ang hlawhtlinna kan hmu zo ta lo, hei hi Party President ka nihna angin inthlana kan chak lohna hi ka mawh a ni. Ka kum te a lo tam ve ta a, kan ram tana hna tha thawk turin Pathianin hruaitu min pe leh dawn, tih sawiin, Congress Party hruaitu chuan Pathian lam hawia fing leh remhre taka Party hruai a tul a ni. Kan duh leh kan tum ber chu nihna leh chanvo ni lovin kan ram, kan hnam, kan sakhua humhim leh kan party thatna ni zel rawh se, a ti bawk.

Lal Thanzara, Senior Vice President, MPCC chuan, Pathianin engkim tan hun a ruat a, roreltute pawh Pathian ruat an ni, tih sawiin, ram enkawl turin Pathianin mipui te kaltlangin roreltu min pe a, party leh pawl hruai turin hruaitu min pe a, min ruat sak thin. Mahni chauh in ngaihtuah lovin, tunah leh nakin thlenga Party Congress Party hnathawk leh theia kaihthawh chiah hi ka ngaihtuah tur a ni, a ti.

MPCC Vice President Pu Lalnunmawia Chuaungo chuan, Tanrualna in thil tha tam tak tak a thlen tir thin a, ram chhungah danglamna a thlen thin, tih sawiin, ram tana Congress party in hna tam tak Pathian leh mipuite zarah a lo thawk tawh a, chutiang hna tha nasa zawka thawk leh turin mahni pawh danglam ngamin, kan zavaia taimakna, ranrualna leh inpekna nen ram siam tha turin kan tho leh ang, a ti bawk.

Dr. Lalmalsawma Nghaka, Treasurer MPCC pawhin thusawiin, Congress Party in malsawmna a dawn thin chhan chu mi harsa leh hniam zawk te lamtang a nihna hi a ni, tih sawiin, midangte hmangaihna nen thawk ila, LALPA nghâktute erawh chuan an chakna an siam ṭha leh ang a; mupuite angin thlain an thlâwk chho vang a, hah lovin an tlân ang a, chau lovin kein an kal ang…” a ti bawk.

He hun hi John Siamkunga GS MPCC in a kaihruai a. Upa K. Lalthantluanga Secretary MPCC in hunserh a hmang a, Zualbawihi a zai bawk.