PC Party Office thar hawng

Vawiin January ni 23, 2024 chawhma dar 11 khan kan Party President Vanlalruata chuan an party office thar chu hawngin, ram siamtha tura thawhpui atan mi zawng zawng a sawm a. He an office thar hi Most Rev. Stephen Rotluanga, CSC, D.D. Bishop of Aizawl chuan a hlan thianghlim bawk a ni.

Party office hawn programme hi Vice President Lalthuamliana’n kaihruaiin party office din thar a ni ang bawka party pawh din thar anih dawn thu sawiin chutiang tur chuan President kan nei tha tawk a ni, a ti.

Chawhma dar 11-ah ribbon chep chatin office thar hi President Vanlalruata’n a hawng a. Thu sawi zuiin PC Party chuan opposition party in ram siamtha tura a tih theih sang ber kan tih tur thu sawiin, “Ram siamtha turin chutiang buaipuitu zingah chuan tel a, engemaw nih a ngai a. A duh apiang tan kan party-ah hian hmun a awm a ni,” tiin Vanlalruata chuan, “MP Inthlan lo awm turah hian candidate tha tak neiin kan ram, kan hnam leh kan sakhaw himna turin hma kan la dawn,” a ti.

Office thar hlan thianghlimna hun hmangtu Aizawl Bishop chuan,”Heti ang Political Party programme hun ang ah hian ka kal tam lo viau nachungin, Sawrkar tawh ho te ah ka lokal ve zeuh zeuh tawh tho a ni. PC Party hruaitu Pu Ṭhena kha Bishop hna ka chelh tirh te ah a lo leng a, PC Party Policy bulpui – “6 Basic Needs” te kan sawiho fe hnu in, Pu Ṭhen-a chuan, ‘He ram kalsiam tan hian A, Aw, B leh A, B, C te kan lo siam in abul tumte kan lo ni ve tawh a, a hnulam erawh chu tuna hruaitute kut ah ka dah tawh a ni,’ tih thu te a sawi bawk.

He hunah hian Party Treasurer HK Liansawta’n report pein party office building chu a hmun ngaiah kum 1982-ah sak anih tawh thu te, tuna building thar hi kum kalta 2023 kum tir atanga sak anih thu te a sawi a. Party General Secretary H Lalremsiama lawmthu a sawi bawk a ni.