Vawiin ni 15th January, 2024 (Thawhtanni) chawhnu dar 1 khan MZP General Headquarters Emergency Meeting neih a ni a. NIT chungchang leh Free Movement Regime (FMR) chungchang an rel.
MZP Meeting chuan NIT Mizoram hna lak dan dik lo chungchanga pawl hmalakna leh thlen chin chu uluk takin a ngaihtuah a. NIT a thawk tur Asst. Registrar hna lakah induhsakna uchuak tak leh thil felfai lo tam tak a awm tih a hria a. A rang thei ang bera cancel turin MZP chuan NIT thuneitute a phut a ni.
Mizo zirlaite leh lehkha thiam thalai hna zawng mekte inkarah inelna thianghlim tak a awm zel theih nan, he hna lak dan fello tak hi cancel thuai a nih loh chuan ni 17 January, 2024 a NIT Mizoram Convocation neih tur chu dodal (picketing) nise ti a rel a ni. NIT Mizoram Asst. Registrar hna lak tawh cancel tur hian, Ministry of Education-ah pawh lehkha thawn nise tih a ni bawk.
Meeting chuan, Myanmar leh Mizoram inkar zalen taka inkalpawh theihna Free Movement Regime (FMR) tun hnaia hlih tumna leh Zofate inkarah indaidanna bang hung (Border fencing) tumna awm hi tha lo a ti hle a. A tawp thlengin dodal nise tih a ni. Hemi chungchanga Mizoram Chief Minister Pu Lalduhoma hmalakna hi MZP chuan lawmawm a tiin a thlawp tlat a. Hemi chungchangah hian India Prime Minister leh Union Home Minister hnenah Memorandum a thehluh nise tih a ni bawk.
