Vawiin 15.1.2024 (Thawhtanni) khan Lunglei District Congress Committee chuan, kumin kum 2024 atana an party office Congress Bhavan hawnna an nei.
Lunglei Congress Bhavan hawnna inkhawm hi Lunglei District Congress Committee President Pu K. Lalchhawnzauva’n a kaihruai a. Bhavan hawn inkhawm-ah hian Ex-Minister Pu Zodintluanga Ralte leh Pu PC Lalthanliana te bakah, inthlanpui kan hmachhawn zawh taka Lunglei District chhung a Congress party MLA candidate ten thu an sawi bawk.
Ex-Minister Pu Zodintluanga chuan thu sawiin, Inthlan kan hmachhawn zo a, MLA pakhat chiah kan nei. Heivang hian kan hnual mai ang tih a hlauhawm. Tun atangin han in sangmar leh tan ila, kum 5 hnuah chuan sorkarna kan chang leh ngei dawn tih hi ka ring tlat a ni, a ti.
Pu Zodintluanga chuan, inthlan kan hmachhawn zawh tak-a Congress vote hmuh zo zai kha congress hlang vote ani a, Congress hi kan la tha a, a thlapang awm loh tiin,
tunhma chuan Mizoramah party pahnih Congress leh MNF bak inkhing tak tak kan awm ngai loh avangin term hnih chhung kan in sorkar chhawk thin a. Tunah chuan party lian pathum kan awm tawh avangin term hnih a zawna sorkarna chan hi thil harsa tak a ni tawh dawn a ni, a ti bawk.
Pu Zodintluanga chuan, kum 5 kalta chhung khan MNF sorkar khan Mizoram an sawp chhiat nasat zia leh khatih laia Chief Minister leh a thurulpui mi tlemte ten Mizoram sum an khawih chingpen nasat zia kha Mizoram mipui ten kan hre chiang em em ani, a ti a.
Sum chakna hmang-a sorkar leh ngei tum-a nasa taka tan an la chung khan term khat bak sawrkar na an chang zo ta lo a. SEDP Rs. 25000 hmang leh SASCI sum Vaibelchhe tam tak hmangin MLA 10 an in lei tling thei hram a ni, a ti bawk.
ZPM chung chang sawiin, Pu Zodintluanga chuan, Mizoram pumah ZPM thli a tleh an ti a, seat 27 bak an la zo lo.
Congress thli a tleh tia sawi chiam pawh a awm loh laiin keini chuan seat 32 leh seat 34 kan la thei a ni, a ti a. Hei hian kan ruhrel len zia chiang takin a tilang a.Ruhrel len ringawt hi sorkarna chelhnani lo thenkhat chuan an ti tan leh der tawh a, a dikna chen chu a awm teh meuh mai a ti a.
Tuna ZPM sorkarna chhan pawh party-a inhmang lote an ni a, a thlang tlingtu te hian an han hrechiang chho ang a, inthlan lehah chuan a tam zawkin vote zui tlakah an ngai dawn lo tih a chiang reng a ni, a ti a
Tuna ZPM vote dualtu ho khan tute nge an vote tak ang. MNF chu an vote dawn lo tih a chiang a,, a chhan chu kum 5 chhung lek pawhin an hne hman em a, kan ram kaihruai tur hian an duh tawh dawn lo tih a chiang reng a ni, a ti bawk.
Pu Zodintluanga chuan, inthlan lehah hian ZPM khingpui ber tur chu Congress hi kan ni tiin. Tuna ZPM vote tu tam tak hi ZPM an ni loa, ZPM an han sorkar chho anga an hnathawh leh Congress sorkar laia kan hnathawhte an han thlirin an han khaikhin chho dawn a ni, a ti a. Tuna beisei neia an vote ZPM hi eng an nih lohzia an hre chiang dawn a, chungmite chuan Congress hna lo thawh nasatzia hriain Congress ngei min vote leh dawn a ni, a ti bawk.
Pu Zodintluanga chuan, ZPM sorkar chu tun dinhmunah chuan mipuiin an laka beiseina an neihsan em avangin an thil tihfuh tawk loh pawh an la ngaidam rih a. Mah se, hun a kal anga, an insawi ang an nih lohzia mipuiin an hre chho dawn chauh, chung hunah chuan mipuite hian kan thusawi an hrethiam tawh ang a, ZPM nihna kan sawi thinte a dikzia an hre tawh dwn a ni tiin,
Kan media rintlak tak tak ten RTI nen an han umzui chho ve ang a, political party lamte pawhin ZPM nihna dik tak kan han pholang chho zel ang a. ZPM hian kum 1 a liam meuh chuan mi tam tak rin a hlawh tawh hauh lo ang, a ti bawk.
ZPM thlak tura mipuiin an duh ber tur chu kan ram tana rotling zawng zawng tih theih deuhthaw dintu Congress lo chu kan awm dawn lo tiin Pu Zodintluanga chuan, tuna kan dinhmun hi hetiang hi nimah se, kan party tan hian hnual viauna hun a ni loin ka hria a. Kan ram leh hnam tana hmasawnna nasa zawk thlen tura sorkar leh turin tun atanga kan inbuatsaih lawk a tul tak zet zet a ni, a ti bawk.
Pu Zodintluanga chuan
Kan Chief Minister thar hi thla hnih em pawh a la CM hmain a tawng tam tawh hle tih sawiin, ram tana a hnathawh erawh hriat tur a la awm lem lo, a ti a. Kan CM kalta aimah khan a tawng tamin, a tawng a umpha lo chho dawn niin a lang tan a. Mahniin ram tana hnathawh la nei mang si loa midang sel chiam chiam ringawt hi mipuiin an nin hun a la awm dawn a. Tun atanga kum 1 han liam se, kan Chief Minister thusawi hi mipuiin eng angin nge an ngaih a hriat chho dawn a ni, a ti bawk.
Eptu MLA an nih lai khan ZPM MLA te khan MLA te hamthatna kha sorkarna an chan hunah an ti tlem tur thu nasa takin an au pui a,
Sorkarna an chan atanga reilote chhung hian, MLA te hamthatna nasa takin an ti pung der tawh a ni, a ti a.
Tin, Mizoram Chief Minister mau tuipui thin ten sorkarna fawng an chelh rei loh zia pawh a lo lang chiang zel dawn a, Dar nawn hnu a an party a luh tum te an mamawh tawh loh thu sawi tu ram hruaitu lu ber kan nei hi kan la inchhir thuai in ka ring a n, a ti bawk.
Lunglei Congress Bhavan hawnna inkhawm ah hian Lunglei District chhung a Congress party hruaitu senior tak tak te pawh in thu an sawi bawk a ni.
