AAP Mizoram chuan thingtlang khaw hrang hrangte tlawh kualin an harsatna hrang hrangte leh mipuite’n sawrkar leh an MLA-te an beisei dan chiang taka an hmuh bakah khaw hrang hrang dinhmun dik tak mit ngeiin an hmuhpui a, chuta an hmuh chhuah tak; Mizoram mipui tam zawk mamawh leh dinhmun veiawm tak tak an hmuh te a hnuai a mi ang hian an sawi.
1. Inkalpawhna (Transportation): Lirthei veivahna tur kawng a that tawk lohzia a taka tawngin kan hmu a, a tlangpuiin kawng a zimin khuar leh tui tlin theihna a tam em em a, hei hi kawng tam taka hmasawnna tur tithuanawptu lian tak a nih theih avangin ngaihpawimawh a tul kan ti hle a ni. Mizoram in hma a sawn dawn chuan khawi hmun pawh hi awlsam tak a kalpawh zung zung theih a ngai a ni.
2. Zirna (Education): Kan ramah zirna dinhmunin beisei a phak loh mek lai hian a bikin thingtlang lamah a chhe zual em em a, zirtirtu indaihlohna a nasain zirna in leh hmanrua duh angin a tha tawk lo em em a. Ram hmasawnna thlen thei khawp zirna nei tur chuan tun aia nasa zawkin zirna lamah hmalakna mipui leh sawrkarin kan neih a ngai hle a ni.
Lehkhabu dawn kim loh kan aupui fo tawh pawhin awmzia ala nei lo a, tun aia nasa zawk a auhchhuah pui pawh kan tum mek a, Kum chanve kan hmang tawh a School enkawlna tur School Grant pawh pek anla nilo a, tui leh electric bill-te chu zirtirtu in an mahni pawisa atanga pe an awm bawk a ni. Mizoram school a tha ti a au dum dumte hian a hmunah ngei zirchiang se kan ti hle bawk.
3. Health Care: Hriselna lamah mipuite’n enkawlna tha (Health Care) an dawng meuh lo niin a lang a, inenkawlna hmun awm that lohna a tamin inenkawlna hmanrua thlengin an hnianghnar tawk lo hle tih kan hmu a, hei hian nasa takin mipuiah harsatna a siam bawk a, in kalpawhna tha lo nen thingtlang mite’n damdawiin tha zawk an panna kawngah nunna hlu tak an chan nasa emem a ni.
4. Ram awl hman tangkai: Mizoramah hian hmun rem leh awl tha tak tak khaw chhung leh khaw pawnah ram hmasawnna atana hman tangkai theih tur hmun hlu tak tak kan la ngahzia chiang takin kan hmu a. Hetiang ram awl tha tangkai taka hmang thei tur; a ngaihna hria sawrkar kan mamawh hle a ni.
5. Gas : Thingtlang hmun tam tak, gas luh lohna khua a tam em em a, gas la tur in khaw dang daihah kal a ngai thin a, thingtlang mite an khawngaihthlak emem a ni. Hemi bakah gas lak a buaithlak avangin thing tuah lo theilo dinhmunah an ding a, hei hian kan ramngawte a nghawng nasa emem a ni.
AAP Mizoram chuan, “Sawi tur tam tak a awm rualin kan ngaihpawimawh zual kan han tarlang a, hengte hi kan ram hruaitu leh hruai tum mekte hian ngai pawimawh se, primary level atanga siamthat kan tum a nih loh chuan hmasawnna mumal kan nei thei ngailo ang tih hi keini ngaihdan a ni,” an ti bawk.
