Vawiin September 23, 2023 (Inrinni) zingkar khan Dr. Vanlalthlana, MLA Aizawl North II chuan Ramthar veng YMA hnenah MLA fund atanga lei Motor a hlan.
Motor hlanna hun hi YMA Office, Ramthar vengah hman a ni a. PC Zarzokima, Vice President-in kaihruaiin, Dr. Mathlana’n, Pu Samuel Lalbiaktluanga, President, Ramthar Veng YMA hnenah Motor thar a hlan a, Maj. K Zaliana, Commanding Officer, Salvation Army Hebron bial-in motor thar Pathian hnena hlanna hun a hmang a ni.
Dr. Mathlana chuan, “MLA ka tlin tirha ka rilru a awm chu, NGO te hian MLA fund hi an chang ve tur a ni tih hi a ni, chutiang chuan bial chhung NGO te hnenah MLA fund hi sem rual a ni a, Ramthar Veng YMA te a chang tute zingah in tel hi ka lawmpui takzet che u a ni. Ramthar Veng YMA ten he motor thar dawn hi in phu hlein ka hria a, covid hripuiin min nuai lai pawha bial mipui te tana in thawhhlawk zia ka hmuh hian he motor thar dawn hi in phu tak zet a ni. He motor thar hi Ramthar Veng YMA te hnenah MLA in a hlan a ni mai lo va, Aizawl North II mipui ten an hlan che u a ni tih hi min hriatpui turin ka ngen che u a, khawtlangin tangkai taka in hman a, midangte tan a malsawmna a nih ngei ka beisei a ni,” a ti.
Motor hlanna hunah hian kohhran leh khawtlang hruaitu hrang hrang te bakah ZPM Aizawl North II block hruaitute’n MLA hi an tawiawm a ni.
