Ex-Minister KS Thanga hnungzuia Congress Party atanga ZPM zawmtute, Aisawl South III huamchhunga mite chuan “ZPM-in dawta min bum avangin ZPM chhuahsanin MNF kan zawm,” tiin vawiin khan Aizawl Press Club’-ah chanchintharf lakhawmtute an kawm.
Sathranga Ralte, Ex Vice President, Congress South III Block II & Ex ZPM chuan, “Zoram Peoples Movement chuan August ni 24, 2023 khan Vanapa Hall-ah inthlanpui lo awm tura an candidate te puanna leh campaign khuhhawnna an nei a. He hunah hian Congress pa challang, Pu KS Thanga leh a hote thahnem tak min lawmlut nghal a ni. ZPM party-ah rinawm taka awm a, kan theihna ang anga hnathawk tura kan inruahman mek laiin ZPM-in an intiam ang an tih leh tak loh avangin thutlukna dang siam leh a ngai ta a, a pawi kan ti hle a ni.
“Kan hotupa hi tunhma atanga zui tawh kan ni a, hun rei tak MLA leh Minister a nih lai atangin kan lo zui tawh a. Congress Party-ah chhan hrang hrang avangin kan awm ve a rem tawh lo a, kan hotupa berin Congress Party a chhuahsan takah chuan vawi tam tak kan awm zel dan tur kan sawikhawm ve a. Kan hotupa ho hian kan inrawn khawm a, Zoram Peoples Movement lamah luh mai kan titlu ta a, lung si takin August ni 24, 2023 khan Vanapa Hall-ah min lawmlut ta a ni.
“ZPM Party-ah hian lungsi takin kan awm zel dawn emaw kan tih laiin, ZPM Party chuan kan hotupa hi lenchilhin Vice President post an pek theih loh thu an hrilh leh ta si a. Hetiang a nih avang hian a hote e’ngemaw zat chuan loh theih lovin bumtu party ZPM chu beidawngin kan chhuah san leh ta a ni. Kan pu ber pawh hi kan hriat theih chinah chuan chawlh rih a duh a ni.
“Kan pu hova ZPM kan zawm dawn hian vawi e’ngemaw zat inbiakna neih a ni a. “Party-a kan lut leh dawn rau rau a nih chuan kan pu ber hian nihna zahawm ve tawk tak nei se,” tiin ZPM Vice President post kan dil sak a. ‘ZPM Vice President-ah kan hotupa hi min dah sak theih chuan ZPM kan rawn zawm ang,’ tiin thutlukna kan siam a ni.
“He kan inbiakna hi Elected OB-ah an sawiho a, Elected Office Bearers chuan Pu KS Thanga chu Vice President atana dah an remtih thu kan hre ta a. Hetianga kan thil phut kan hotupa Vice President-a dah an remtih takah chuan ZPM zawm tur hian thutlukna kan siam ta a, Congress party-a a naute thin sang chuang laiin a hovin ZPM chu kan zawm ta a ni.
“Kan sawi tak ang khan hetianga lungsi tak leh ngaih tha taka ZPM-a kan awm mek lai hian thuthar kan hre ta a, ZPM chuan min lo bum reng a lo ni a. Kan hotupa ber chu Vice President-a dah tumna reng reng an lo nei lo a, tunah pawh nihna engmah an la pe lo a. Min bum mai bakah ZPM Hqrs. a hotute an lungrual lovin, an chhungkua an lo buai hle tih kan hre thei nghal a, awmzui na tlakah kan ngai thlawt lo a ni.
“ZPM President hi Kohhran Upa a ni a, an Leader pawh Kohran Upa a ni a, an Vice President zinga pakhat pawh Pastor pension meuh a ni a, hetiang miin kan pu leh a hote min bum duh hi a mak hle a, a rilru nat thlak hle. Hetiang a nih avang hian bum hmang party-a awm reng hi thil theih lohah ngaiin ZPM party-a kan pu zuitu thahnem tak chuan ZPM chhuahsanin MNF kan zawm ta a. He thu dik hi Zoram mipuite’n an hriat tul kan ti a ni.
“Mahni sawi loh anga awm thin, Zoram mipuite bum tuma vehthlem mektu ZPM kalphung thar hi Zoram mipuiin an hriat chian kan duh a ni,” a ti bawk.
