“Kan tu leh fate hmalam hun tur thlirin vawiinah hian ṭang ila, kan ram, kan hnam, kan Sakhua himna turin Congress a sawrkar angai.” Lalsawta, President MPCC.
Lunglei.22nd.Sept. 2033: Vawiin khan Lunglei Dist Congress Committee (LDCC) chuan LDCC Bhavan- ah chhung inkhawm an neia, chhung inkhawm hi LDCC President, Pu K.L Chhawnzauva’n a kaihruaia a ni.
Vawiin LDCC chhung inkhawma thusawitu MPCC, President Pu Lalsawta chuan kan tu leh fate hmalam hun thlirin vawiin aṭang hian ṭan la ila kan ram, ian hnam leh sakhua himna turin BJP thawhpui ngailo tur Mizoramah Congress a sawrkar angai a ni a ti. Pu Sawta chuan tuna kan sawrkar hrawnah hian Politicians khel fuh leh khel fuhlo te inkar a hla em em a Politics ah hian ram dinchhuahna leh ram ṭhatna a awm a, chutiang tur chuan kan khel tur a ni a, Politicians lak aṭanga hamṭhatna beisei vanga Politicians khelh hi a hrisel lo a ni tiin Congress Party chuan ram dinchhuah nan Politics i khel ang u a ti.
Pu Sawta chuan kan sakhuana hian kan nitin nun, kan thil tih reng reng hi min thunun tela, chu chuan Vanramah min la hruai dawn a ni tiin, Sakhuana hi sawi tet thei a nilo a ti a. Kan sakhua avang hian min dotute chu kan sual hneh dawn leh dawn loh hrelo mahila keini chuan huai takin kan sual zel dawn a ni tiin ding nghet tlatin kan sual anga kan tum ram chu kan thleng ngei dawn a ni a ti. Kumin inthlanpui lo awm turah hian Mizoram mipuite hian kan ram kan hnam, kan sakhua chhan tur hian tha kan thawh ve dawn em tih ngaihtuah ila Congress kan sawrkar tir chuan BJP thawhpui ngailo tur MP pahnih kan nei thei anga kan ram kan hnam kan Sakhua a him theih nan Congress Candidate te kan thlan tlin angai a, mipuite pawhin khawngaih taka min Vote sak turin ka ngen tak meuh a ni MPCC President chuan tiin, BJP thawhpuitu MNF emaw BJP thawhpui mai tur Regional Party tho ZPM te kan thlan tlin chuan kan ram, kan hnam leh kan Sakhua tan a him dawn lo a ni a ti.
BJP chu pawisa leh thuneihna an hman nasat avangin an hlauhawm hle a, Hmarchhak bikah chuan Mizoram ah chiah hian an duh angin an che theilo a, a chhan chu an mahni thawhpuitu MNF hian Mizo mipuite lakah BJP thawhpui anga lan an hreh vang a ni Pu Sawta chuan a ti a, hetihlai hian ZPM pawh hian an sawrkar chuan BJP thawhpui bak tih tur an neilo a ni a ti. Nakuma Sawrkarlaipui inthlan turah Congress kaihhruai an sawrkar ngei dawn avangin Mizoramah pawh lungsi taka an thawhpui theih tur Congress kan sawrkar tir angai a, BJP thawhpui ngailo tur Congress Party lamah mipuiten vote kan pek a hun ta a ni a ti bawk. Kan ram ti danglam tur hian ramdang aṭangin tumah an lokal dawn lo tih MPCC President chuan sawiin, kan ṭhenawm Manipur rama hnam hnufual leh Kristian te chunga thil thleng te hian min ti harh sela Mizorama a thlen velohna tura hmala thei leh danglamna siam thei ber chu Congress Party kan nih avangin inthlanpui lo awm turah Congress a sawrkar ngei theihna Party mipuite chu theihtawp chhuah tur leh mipuite pawh Congress Candidate te vote sak ṭheuh turin Pu Lalsawta MPCC President chuan sawmin, Congress Party a awm ṭhin tuna Party danga awm ta te zawng zawng pawh an Inpui Congress Party khawngaih taka kir leh turin a sawm bawk ni.
Vawiina LDCC Bhavana chhung inkhawmah hian Pu Zodintluanga MLA, Pi Lalnilawmi MPCC Seceretary, Pu K.Lalchhunawma MPCC, General Secretary te pawhin thu an sawi bawk a ni.