Aizawl March 29 : Civil Hospital, Aizawl-a CT Scan (16 slices) khawl hi kum 2013-ah NEC atanga sum hmuh hmangin bun a ni a, kum 8 zet rim taka hman a nih avangin repair a ngai fo tawh a. Chuvangin, a thlâkna tur khawl thar leh ṭha zâwk lei turin Sorkar-in hmanhmawh takin hma a la a. Rs. 2,60,00,000/- man CT Scan (64 slices) khawl ṭha zâwk chu kum hmasa lamah khan NESIDS sum hmangin lei a ni a.
A khawl hlui hi dt. 21.06.2021 khan Siaha Hospital-a dah tura rêl a ni a, siam ngai laite pawh sawn fel hnua siam tura tih a ni. Amaherawhchu sawn ruala thawm ṭhatna tur senso tura chhût Rs. 81,73,260/- leh a khawl hlui tawh tak enkawl zuina (Annual Maintenance Contract) senso tura chhût Rs. 21.0 lakh per year (+ 5% per annum) te ngaihtuahin kawl zui hi a manhla tawh lova hriat a ni a. Chuvangin Rs. 39,76,000/- (inclusive of GST) in hralh a ni a. A leitu te’n an rawn la fel tawh bawk a ni.
Tunah hian CT Scan khawl thar (64 slices) bun na’n, Atomic Energy Regulatory Board (AERB) thupêkte zâwm turin a khawl hlui dahna hmunhma hi chei ṭhat mêk a ni a. Peih fel vat tum a ni.