Aizawl, August 22, 2023 (Thawhlehni): Aizawl South ll bialtu MLA Lalchhuanthanga chuan a bial chhung Tlangnuam YMA hnenah a fund aṭanga a leisak Pick Up (4×4) chu YMA in a ṭul anga an hman atan a hlan a. Hemi rual hian YMA Library-a dah tur lehkhabu chi hrang hrang bu 23 a hlan tel bawk.
Lalchhuanthanga chuan a bial chhunga YMA Branch ṭhenkhat- Tuikhuahtlang, ITI leh Salem veng YMA branch hnenah Pick up a lo hlan tawh a. YMA ten chhiat ni ṭhat ni atan ṭangkai taka an hman mek thu a sawi a. Tlangnuam branch YMA te pawhin ṭangkai taka an hman a beisei thu a sawi.
Hetih rual hian Tlangnuam YMA Library ah lehkhabu chi hrang hrang 23 a hlan tel nghal bawk a. Veng chhung mipuiten Library hlutna an hriat thar a, ṭangkai taka an chhawr thar zel a duh thu a sawi nghal bawk.
Pick up leh lehkhabu inhlanna hun hi nizan (Thawhṭanni) khan Lalchhuanthanga in kawtah Tlanuam Branch YMA te nen hun hman a ni a. YMA pawhin chhiat ni ṭhat ni atana hman tur motor ṭha tak an nei chu lawmawm an ti a, bialtu MLA chungah lawmthu an sawi bawk a ni.
