BJP Mizoram chuan vawiin 21st August, 2023 (Monday) hian BJP State Office, Mipui Rûn, Upper Republic ah Karthar inhlanna leh Political Session neiin, Lalrintluanga Hnamte, State Kisan Morcha President-in inkhawm a kaihruai a, Johny Lalthanpuia, State Media Convener in Hunserh a hmanga, Pu Vanlalhmuaka, State President-in thusawina hun a nei a ni.
Vanlalhmuaka chuan, “Mizorama Sorkarna lo chelh tawh Pu Lal-Thanhawla chuan Central-a Sorkar apiang hi State ah kan Sorkar tir a ngai a ni tih a sawi hi a sawi dik in, Central Sorkar lai chu State Sorkar ah an pawimawh thu a sawi thin chu, vawiin ah hian Pu Hawla thusawi hi Mizoram mipui pawh hian awih ni ila chuan kan ṭhatpui tawh hle tur a ni,” a ti.
“Pu Hawla thusawi hi ṭhenawm State-te chuan an lo awihin, an lo rin bawk avangin vawiin ah chuan NE States-ah Congress Party-te chuan BJP an zawm ta dual dual a, chumi avang chuan ṭhenawm State ah chuan Central Blessing dawngin Development nasa takin a thleng ta chur chur mai a ni. Chutiang chiah chuan Pu Hawla kaihhruai Congress Party khan BJP kha lo zawm dial se chuan Mizoram ah hian nasa takin Development kan hmu anga, mi retheite’n lei rem kan rap ve tawh ngei tur a ni,” a ti.
Vanlalhmuaka chuan sawi chhunzawmin, “BJP Mizoram chuan vawiin hian kan sawi fo duh chu Mizoram First tih hi a ni. Mizoram hi kan ram a ni a, Zofate Jerusalem atan, a taka siam turin keini BJP chuan Mizoram hi a hmasa ber ah kan dah a, Mizoram aṭang hian thil ṭha chauh a chhuak tur a ni tih hi kan thupui a ni tur a ni. MNF Sorkar chuan kum 5 chhung Delhi khawpui ah min vahvaih pui a, Cheng Nuai 3 min risk pui a, kan hlawhchham thak a, CM leh a kaihhruai te vawitam tak Delhi ah kalin kut ruakin an lo haw leh thin a, kan Minister rual te leh MP te vawitam tak Airport ah hmuak thin mah ila, thil tha hawn sawi tur an nei lo thung a ni. Chuvangin Mizoram mamawh tak tak haichhuak a, kan Ramah seng lut tur chuan BJP Sorkar kan mamawh a ni tih vawiin ah hian Mizoram mipui ten hria in 2023 MLA General Election lo awm tur ah hian BJP Mizoram tan thlang turin kan in ngen a ni a ti bawk.
