Vawiin tlai lam thlenga Khawthlangtuipui chim chin a san belh zel rih avangin, Tlabung khawchhunga chhungkaw 30-te chu tuilian chim phak loh hmun him lamah sawn luh an ni tawh.
Tlabung SDO (C) Pu H Zonunmawia kaihhruaina hnuaiah mawhphurhna hrang hrang chelh tura ruat Tlabung VC, Khawthlangtuipui group YMA leh Young Pahari Association aiawhten tuilian tuarte chhawmdawl hna kalpuiin, vawiin tlai thleng khan khawchhunga chhungkaw 30-te chu hmun him lamah suanluh an ni tawh a, Tlabung khaw pawn Nunsury khuaa chhungkaw 4 leh Tippereghat-a chhungkaw 6 chu hmun him lama an inthiar chhuah tawh bakah, tuiin a chim hlauhthawnawm zual chhungkaw dang pawh a ṭul thulha an insaseng theih nan, an insawn luhna tur ruahman fel a ni tawh bawk.
Bialtu MLA Pu Nihar Kanti Chakma chuan, tuilian tuarte chhawmdawl hna kalpui a nih dan a tul anga enpuia a fan kual bakah, hmun him lama insuanlutte hnena sem turin buhfai bag 10 a ruahmansak nghal a, hetih lai hian Tlabunga Truck neitu intelkhawmte chuan tuilian tuar inthiarchhuah ngaite bungrua phurh nan a thlawnin an lirthei an thawh tih an puang bawk.
Tun ṭum hi kumin bikah Khawthlangtuipui chim sân lai ber niin, kum 2017 leh 2018-a a len laia a chîm chin erawh tui hian a la thleng lo hle thung a, hetih lai hian Khawthlangtuipui hnar lamah ruah a hân meuh loh avang leh, la sûr chhunzawm zel tura ngaih a nih avangin tui chîm chin hi a sân belh zel rih an rin thu, Tlabung branch YMA hruaitute chuan an sawi.
Hetih lai hian Tlabung leh Lunglei inkalpawhna NH 302 chu hriat theih chinah hmun 4-ah lian tham taka kawng chhaka lei minin a hnawh pin avangin lirthei thenkhat chu nizan zankhuain an tâng a, NHIDCL hotute ruahmannain a theih ang anga kawng hnawhtu lei thenfai zel ni mah se, leimin hi a nasat hlawm avangin a sâwt mawh hle a ni.
