Vawiin August 7, 2023 (Thawhtanni) hian Positive Women Network of Mizoram (PWNM) hotute leh MPCC President Pu Lalsawta te chu PWNM Office Upper Khatla-ah an inkawm a. Mizorama HIV a tlak hniam theihna tura kawng awmdan leh hmalak dan tur te an sawiho a. Pu Lalsawta chuan PWNM tanpuina tangkafai a hlan bawk. .
Pu Lalsawta chuan, Mihring hi ran ang maia Pathianin a siam kan nih loh avangin kan nun hona kawngah nasa zawka kan harsatna leh inpuih kan ngaihna kawnga tan lak ho a tul, tih a sawi a. Harsatna hi tu chungah pawh a tla thei vek. Harsatna in a tuai hriam loh mihring an chhawr tlak loh. Harsatna tam tak paltlang a, beidawnna leh manganna hmachhawntute hlawhtlinna hi a hlu bik a ni. Vanduaina kan chunga a thlenin in dawmkan leh in puih tawn hi Lal Isua min zirtir dan a ni a. Harsatna kan tawhin vanduai bika inngaihna hian rilru dik lo min pe a, kan nih tur ang ni phak lo vin min pawtthla thin. Pathian rawngbawltu hlawhtling leh khawvela mi hlawhtlingte hi harsatna tam tak paltlang te an ni a. Isua hunlaia a rawngbawlna pawh mi tam takin an tih-khai, phâr natna tihdam te a ni a. Kebai te, zeng te, ramhuai zawl te, mitdel leh tawngtheilo te nasa takin a tidam a. Isua zirtirte’n harsatna tam tak paltlanga an thawhna a zarah keini pawh hetiang din hmunah kan din phah a ni, a ti.
Pu Lalsawta chuan, Pathianin khawvela nungdama min dah chhan zawk hi kan thlir reng a tul a. Mihring famkim lo kan ni a, kan hun kal tawhah tih fel loh tam tak kan nei thei. Nimahsela hun liam tawh chu koh kir theih a ni lo va, eng pawisa mahin hun kal tawh a lei let theih hek loh. Tuna kan tihtur hmasa ber chu kan ram, kan hnam leh kan rinna humhim turin, keini leh nangni tana kan thawh a hun takzet a, kan tihmakmawh a ni, a ti bawk.
PWNM hotute chuan, harsatna tam tak paltlanga PWNM din tan dan leh an hmalak chhoh dan te leh midang ten damna an chan theihna tura an bul tan a nih dan te, Sorkar nena an thawhona hrang hrang te, tunhnaiah bakah Kohhran hrang hranga Kohhran hmeichhia ten hemi kawnga an thawhpuina an hlawkpui zia te bakah Mizorama HIV dinhmun te sawiin inenkawlna tha dawngtu te dinhmun leh an harsatna te an tarlang a. HIV darh zel tur venna kawngah a thawktute hmalakna ruahmanna tha zawk nena hmathar a ngaih tih sawiin, HIV vei hman lo khawpa kan inbuatsaih a ngaih dan te an sawi bakah Sex City an tih khawpa hmeichhiat mipat hman hluarna Bangkok leh Cambodia-ah te meuh pawh HIV an control thei. Ruahmanna tha zawk nena hma thar lak a nih chuan Mizoram HIV dinhmun hi nasa takin a control theih dan te an sawi bawk.
Vawiina MPCC President leh PWNM hruaitute inkawm hi AIPC President Dr. Henry Zodinliana, Pu Lalhruaitluanga Bawihtlung, Secretary MPCC leh Nula Elizabeth malsawmtluangi, Social Media department, MPCC ten an tawiawm a ni.
