August 5, 2023 (Inrinni) tlai dar 4:30 khan All India Congress Committee (AICC) hruaitu Pi Sonia Gandhi leh Rahul Gandhi te chuan an chenna In 10 Janpath, New Delhi-ah India ram Congress Party rorelna sang Congress Steering Committee member Pu Lal Thanhawla chu lengah an sawm a, Manipura Zofate tawrhna titawp tura chak zawka hmalak dan tur an sawi dun.
Pu Lal Thanhawla chuan, Manipur-ah BJP sorkar leh Central-a Modi kaihhruai BJP avanga Zofate tawrhna rei lutuk titawp tura a rang lama hmalakna neih leh thuai a tul tih sawiin, an nunphung pangngaia awm leh tur pawha hun a duh rei tawh tur zia te leh chutiang nunphung pangngaia nun an la hlat zia te a sawi a. Zofate chunga raw-va taka BJP sorkar a chet dan chungchang tih tawp thuai a nih dan tur te an sawi a ni.
Pu Lal Thanhawla chuan, Kumin 2023 MLA inthlanah Pu Lalsawta kaihhruai Congress Party in Mizoramah sorkarna an chan ngei a ring, tih sawiin, chumi tur chuan Mizorama mi rinhlawh mi tha tak tak kan beisei phak loh ten Congress an zawm a, tunah pawh mi tha, ram hruai tura mipuiin an duh te’n Congress Party an zawm leh thuai dawn a. Heng mite hian Pu Lalsawta hovin Mizoram mipui beisei leh an tuihalna sorkar tha chu an pe ang, a ti a, chung atan chuan Rahul Gandhi chu a tul anga an chhungkua pawha che chhuak turin a ngen a. Rahul Gandhi pawhin Mizoram mipui chu a pa atang tawhin an chhungkaw ngainat an ni a. Mizoram mipuite mamawhna anga chet chu an tan thil tih chakawm tak a ni reng ang, a ti a, a tul ang zela Mizoram tana chet zel an tum tih Pu Lal Thanhawla hi a lo hrilh a ni.
MPCC President Pu Lalsawta hovin July ni 4, 2023 (Thawhlehni) khan AICC President Mallikargun Kharge leh Rahul Gandhi te chuan Manipura Zofate tawrhna chungchang leh India rama Kristian-te chunga hleilenna chungchanga hmalak dan tur hi 24, Akbar Road, AICC Office, New Delhi-ah an lo sawi ho tawh bawk a ni.
Rahul Gandhi leh Pu Lal Thanhawla te inkawmna hunah hian Cingress Steering Committee member Pu Lal Thanhawla hi a nupui Pi Lalriliani, Pi Lucy Sailo leh Pi Rosie Chalrotluangi te’n an tawiawm a ni.
