Mizoram Pradesh Congress Committee chuan vawiin khan Monday Devotion & Political Session an nei a.He hunah hian MPCC President Lal Thanzara chuan thu a sawi a ni.
Lal Thanzara chuan, “Kar kaltaa Mizoram Presbyterian Kohhran Hmeichhe khawmpui vawi 51-na hmannaah khan Speaker Upa Lalnunpuia Hrahsel chuan khawmpui thupui rinawmna a sawiah kan mihringpuitea kan rinawm hi Pathian laka kan rinawmna chu a ni a tia, a dik hmel khawp mai.
“Politics ah pawh hian party ten rorelna thutthlenga an thut theihna tur atana an campaign laia an inzawrhna kha thlantlin an nih hnuah rinawm takin an intiam angin an nung tur tihna angah ka ngai a ni.
“Mipuite laka kan rinawmna kha Pathian laka kan rinawmna a nih chuan kan politics khelhnaah pawh hian rinawm taka kan tih a ngai a ni. Politician te hi kan mihringpuite nena insi reng, inhnimhnai reng kan nih avangin kan mawhphurhna a sang em em a ni. Mipui laka kan thutiam te, ram leh hnam hruaina, ei leh bar zawnna kawnga thutiam kan neih ang zawng zawngte kan sorkar a nih chuan tih ngei ngei kan bat niawm tak a ni.
“Congress chuan mipuite hnena intiamna a la tihkawhtling zel niin kan hria a, MNF unauten tih tur an sawi chu chhungkaw tin hnena nuai thum sem a ni. Mahse, an sorkar chhungin nuai khat dawng pawh an awm a rinawm loh a ni, chumi in a entir chu rinawmna an tlachham hle tih a ni.
“Kan sorkar hrawn mek hian banakaih policy a nei a, an intiamna chu thlaithar zuartute tihchangkana an thlaithar te leisak a ni. Thil harsa a awm lo budget ah kan DAH an ti a ni. Mipuiin kan awiha kan thlang tling a, budget a dah niin an insawi a. Sawhthing ching tute pawh i mangang lo ang u, kan thlaithar leite min leisak turah ngai ang.
“Kan hotute hian Pathian laka an rinawmna chu mipuite laka an thutiam tihhlawhtling an bat hi a ni. Mipuiten, mipuite lakah an rinawm nge rinawmlo tih chu kan en dawn a ni. Sawhthing kan lei dawn an tia an lei mek bawk. Kan sorkar hian tih tura an sawite hi chu an tithei turah ring ila, a tha awm e.
“Kan sorkar chuan kuhva ro tawlh thlaruk chhungin kan titawp ang te an tia, tun thlengin kuhva ro tawlhruk hriat tur a la awm reng a ni. Rinawm taka hmalam pena hma kan lak a ngai a ni. Mipuite lakah kan rinawmna hi Pathian laka kan rinawmna a nih si chuan chutiang zawng chuan mipui ten min thlir dawn a ni.
“Kum 2028 emaw chumi hma in emaw sorkar na siam beiseiin hma kan la mek a ni. Chungah pawh chuan rinwmna tello chuan hlawhtlinna a awm dawn lo, mipuite hnenah pawh kan tihtheih chinah kan inzuar ang. Kan inzawrhna te min tihhlawhtlinpui tur leh mipuite hnenah programme leh policy tha min kawhhmuha min kaihruai turin University a mithiam tak tak te, NGO a inhmang te, Sorkar hnathawk fel tak tak te pawh politics a zuang luta hma min lakpui turin ka ngen che u a ni.
“Politics a insawisel leh inbeih reng hi ka ning kan ti a ni thei, politics kan ngaihsak peih lo kan tiha, politics chhia in kan ram hi a tih chhiat zel chuan kan him dawn bik lo, kan tu leh fate an him dawn bik lo. Pathian duhzawng anga mipui te chunga rinawmna nei chunga hma la turin mifel, mithiamte min zawm turin kan sawm a che u,” a ti.
He hun hi Vanlalruata Khawlhring Secy, MPCC in a kaihruai a. Pathian thuchah Ramchullova, Parmanent Secy hnen atangin ngaihthlak a ni bawk.
